itna achchha na agar hota to hum sa hota

itnā achchhā na agar hotā to ham sā hotā

ham ne dekhā hī na hotā tujhe chāhā hotā

tū mire paas bhī hotā to bhalā kyā hotā

merā ho kar bhī agar aur kisī kā hotā

ab to kuchh kuchh ye sabhī sab hī meñ mil jaate haiñ

koī to hotā ki maiñ hotā to achchhā hotā

nanhe bachchoñ kī tarah sote haiñ hañsne vaalo

tum ne aaise meñ agar aap ko dekhā hotā

ab to jo kuchh huuñ yahī kuchh huuñ burā huuñ ki bhalā

aisā kyā kahiye ki yuuñ hotā to kaisā hotā

jab daraḳhtoñ meñ havā loriyāñ gaatī guzrī

tum ne aaise meñ kisī aur ko dekhā hotā

ye añdherā ki rañge jaatā hai Tahnī Tahnī

tere chehre kī jhalak dekh ke utrā hotā

ek duniyā ne tujhe dekhā hai lekin maiñ ne

jaise dekhā hai tujhe vaise na dekhā hotā

chāñd yuuñ shāḳhoñ meñ uljhā hī na rahtā kal raat

'ashk' vo shaḳhs agar paas hī baiThā hotā

itna achchha na agar hota to hum sa hota

hum ne dekha hi na hota tujhe chaha hota

tu mere pas bhi hota to bhala kya hota

mera ho kar bhi agar aur kisi ka hota

ab to kuchh kuchh ye sabhi sab hi mein mil jate hain

koi to hota ki main hota to achchha hota

nanhe bachchon ki tarah sote hain hansne walo

tum ne aaise mein agar aap ko dekha hota

ab to jo kuchh hun yahi kuchh hun bura hun ki bhala

aisa kya kahiye ki yun hota to kaisa hota

jab daraKHton mein hawa loriyan gati guzri

tum ne aaise mein kisi aur ko dekha hota

ye andhera ki range jata hai Tahni Tahni

tere chehre ki jhalak dekh ke utra hota

ek duniya ne tujhe dekha hai lekin main ne

jaise dekha hai tujhe waise na dekha hota

chand yun shaKHon mein uljha hi na rahta kal raat

'ashk' wo shaKHs agar pas hi baiTha hota