ja laDi yar se hamari aankh

jā laḌī yaar se hamārī aañkh

dekho kar baiThī faujdārī aañkh

shoḳhiyāñ bhuul jaa.e āhū-e-chīñ

dekh paa.e agar tumhārī aañkh

laakh inkār mai-kashī se karo

kahīñ chhuptī bhī hai ḳhumārī aañkh

hovegā rañj yā ḳhushī hogī

kyuuñ phaḌakne lagī hamārī aañkh

jānib-e-dar nigāh-e-hasrat hai

kis kī kartī hai intizārī aañkh

kar ke iqrār ho gayā munkir

sāmne aa ke kis ne maarī aañkh

murġh-e-dil par nigāh hai un kī

aisī dekhī nahīñ shikārī aañkh

hai sitam nok-jhoñk chitvan meñ

laḌ rahī hai chhurī kaTārī aañkh

dil jigar donoñ ho ga.e majrūh

ban ga.ī hai chhurī kaTārī aañkh

koī dam meñ ubhārte haiñ use

us ne dekhā ki ham ne maarī aañkh

'āġhā' sāhab tumhāre dilbar kī

kyā rasīlī hai kyā hai pyārī aañkh

ja laDi yar se hamari aankh

dekho kar baiThi faujdari aankh

shoKHiyan bhul jae aahu-e-chin

dekh pae agar tumhaari aankh

lakh inkar mai-kashi se karo

kahin chhupti bhi hai KHumari aankh

howega ranj ya KHushi hogi

kyun phaDakne lagi hamari aankh

jaanib-e-dar nigah-e-hasrat hai

kis ki karti hai intizari aankh

kar ke iqrar ho gaya munkir

samne aa ke kis ne mari aankh

murgh-e-dil par nigah hai un ki

aisi dekhi nahin shikari aankh

hai sitam nok-jhonk chitwan mein

laD rahi hai chhuri kaTari aankh

dil jigar donon ho gae majruh

ban gai hai chhuri kaTari aankh

koi dam mein ubhaarte hain use

us ne dekha ki hum ne mari aankh

'agha' sahab tumhaare dilbar ki

kya rasili hai kya hai pyari aankh