jada-e-marg-e-musalsal se guzarta jaun

jāda-e-marg-e-musalsal se guzartā jā.ūñ

zindagī ye hai ki har saañs meñ martā jā.ūñ

ḳhuun har lamha-e-maujūd kā kartā jā.ūñ

rañg tasvīr-e-shab-o-roz meñ bhartā jā.ūñ

muntashir silsila-e-ġham ko to kartā jā.ūñ

saath hī saath magar ḳhud bhī bikhartā jā.ūñ

bas yūñhī hamsarī-e-ahl-e-jahāñ mumkin hai

dam-ba-dam apnī bulandī se utartā jā.ūñ

maiñ kisī manzil-e-hastī pe kahāñ ruktā thā

raah meñ tum jo na mil jaao guzartā jā.ūñ

umr bhar jāda-e-pur-ḳhār pe chalnā hogā

do-ghaḌī sāya-e-gul meñ bhī Thahartā jā.ūñ

apnī qismat huuñ ulajhtā hī chalā jaatā huuñ

terī taqdīr nahīñ huuñ ki sañvartā jā.ūñ

madd-o-jazr-e-yam-e-ehsās kā parvarda huuñ

Dūbtā jā.ūñ magar ḳhud hī ubhartā jā.ūñ

aa hī niklā huuñ jo yādoñ ke khañDar tak 'maḳhmūr'

bhūle-bisroñ se mulāqāt bhī kartā jā.ūñ

jada-e-marg-e-musalsal se guzarta jaun

zindagi ye hai ki har sans mein marta jaun

KHun har lamha-e-maujud ka karta jaun

rang taswir-e-shab-o-roz mein bharta jaun

muntashir silsila-e-gham ko to karta jaun

sath hi sath magar KHud bhi bikharta jaun

bas yunhi hamsari-e-ahl-e-jahan mumkin hai

dam-ba-dam apni bulandi se utarta jaun

main kisi manzil-e-hasti pe kahan rukta tha

rah mein tum jo na mil jao guzarta jaun

umr bhar jada-e-pur-KHar pe chalna hoga

do-ghaDi saya-e-gul mein bhi Thaharta jaun

apni qismat hun ulajhta hi chala jata hun

teri taqdir nahin hun ki sanwarta jaun

madd-o-jazr-e-yam-e-ehsas ka parwarda hun

Dubta jaun magar KHud hi ubharta jaun

aa hi nikla hun jo yaadon ke khanDar tak 'maKHmur'

bhule-bisron se mulaqat bhi karta jaun