jaDon bhar kyon mere aangan mein saya tha

jāḌoñ bhar kyoñ mere āñgan meñ saaya thā

sūraj ne kis chhat par ḳhema lagvāyā thā

ik patthar thā jo māthe se Takrāyā thā

pheñkne vaalā shāyad merā maañ jaayā thā

phuul ko kab thī sair kī aur tafrīh kī ḳhvāhish

shoḳh havā hī ne ye rasta dikhlāyā thā

totoñ aur chiḌiyoñ ko ab kyoñ DhūñD rahe ho

niim kā peḌ to ḳhud tum ne hī kaTvāyā thā

jīvan kyā thā taash ke pattoñ kī baazī thī

shaah magar kab mere hisse meñ aayā thā

chāroñ qul ik sūra-e-fīl ik sūra-e-kausar

us din ham ne yahī vazīfa dohrāyā thā

raakh ke Dher pe raqs-kunāñ thā vo ik vahshī

vahī ki jis ne saare shahr ko jalvāyā thā

ek qalam kuchh kore kāġhaz aur kuchh socheñ

le de ke bas yahī to merā sarmāya thā

ik 'shabnam' thī jo mahfūz thī ḳhema-e-gul meñ

pattī pattī ko sūraj ne bahkāyā thā

jaDon bhar kyon mere aangan mein saya tha

suraj ne kis chhat par KHema lagwaya tha

ek patthar tha jo mathe se Takraya tha

phenkne wala shayad mera man jaya tha

phul ko kab thi sair ki aur tafrih ki KHwahish

shoKH hawa hi ne ye rasta dikhlaya tha

toton aur chiDiyon ko ab kyon DhunD rahe ho

nim ka peD to KHud tum ne hi kaTwaya tha

jiwan kya tha tash ke patton ki bazi thi

shah magar kab mere hisse mein aaya tha

chaaron qul ek sura-e-fil ek sura-e-kausar

us din hum ne yahi wazifa dohraya tha

rakh ke Dher pe raqs-kunan tha wo ek wahshi

wahi ki jis ne sare shahr ko jalwaya tha

ek qalam kuchh kore kaghaz aur kuchh sochen

le de ke bas yahi to mera sarmaya tha

ek 'shabnam' thi jo mahfuz thi KHema-e-gul mein

patti patti ko suraj ne bahkaya tha