jaan niklegi meri jaan baDi mushkil se

jaan niklegī mirī jaan baḌī mushkil se

hogī mushkil mirī āsān baḌī mushkil se

vo mire ghar rahe mehmān baḌī mushkil se

raat nikle mire armān baḌī mushkil se

āñkheñ talvoñ se malīñ le ke qadam āñkhoñ par

raah par aa.e nigahbān baḌī mushkil se

thā bahut un ko gilaurī kā uThānā mushkil

dast-e-nāzuk se diyā paan baḌī mushkil se

baḌh ke darbāñ ne liyā aaj bhī dāman merā

kal chhuḌāyā thā garebān baḌī mushkil se

sohbat-e-bad se bachāne kā batāyā sab haal

aaj maane mire ehsān baḌī mushkil se

zulm ko lutf se ta.abīr kareñge dam-e-hashr

jaur se hoñge pashemān baḌī mushkil se

koī kāfir ho jo kal jaa.e sū-e-dair-e-butāñ

ki bachā aaj hī īmān baḌī mushkil se

na rahe maiñ ne kaleje meñ jo rakhnā chāhā

dil meñ Thahre tire paikān baḌī mushkil se

duur abhī manzil-e-maqsūd hai kaale kosoñ

kuchh hue qat.a bayābān baḌī mushkil se

maan lete haiñ vo mushkil se bhī mushkil koī baat

kabhī āsāñ se bhī āsān baḌī mushkil se

mai bahut ruk ke mire halq se utre dam-e-naz.a

abhī mushkil huī āsān baḌī mushkil se

be-shab-e-vasl ye andāz nikalte hī nahīñ

zulf hotī hai pareshān baḌī mushkil se

dhaar talvār kī thī jāda-e-bārīk na thā

hai huā hashr kā maidān baḌī mushkil se

rahte haiñ aise hī insān farishte ban kar

aadmī bante haiñ insān baḌī mushkil se

dil-e-bismil meñ kuchh is tarah hue the paivast

TuuT kar nikle haiñ paikān baḌī mushkil se

yahī andāz yahī vaz.a jo rakkhoge 'riyāz'

log samjheñge musalmān baḌī mushkil se

jaan niklegi meri jaan baDi mushkil se

hogi mushkil meri aasan baDi mushkil se

wo mere ghar rahe mehman baDi mushkil se

raat nikle mere arman baDi mushkil se

aankhen talwon se malin le ke qadam aankhon par

rah par aae nigahban baDi mushkil se

tha bahut un ko gilauri ka uThana mushkil

dast-e-nazuk se diya pan baDi mushkil se

baDh ke darban ne liya aaj bhi daman mera

kal chhuDaya tha gareban baDi mushkil se

sohbat-e-bad se bachane ka bataya sab haal

aaj mane mere ehsan baDi mushkil se

zulm ko lutf se tabir karenge dam-e-hashr

jaur se honge pasheman baDi mushkil se

koi kafir ho jo kal jae su-e-dair-e-butan

ki bacha aaj hi iman baDi mushkil se

na rahe main ne kaleje mein jo rakhna chaha

dil mein Thahre tere paikan baDi mushkil se

dur abhi manzil-e-maqsud hai kale koson

kuchh hue qata bayaban baDi mushkil se

man lete hain wo mushkil se bhi mushkil koi baat

kabhi aasan se bhi aasan baDi mushkil se

mai bahut ruk ke mere halq se utre dam-e-naza

abhi mushkil hui aasan baDi mushkil se

be-shab-e-wasl ye andaz nikalte hi nahin

zulf hoti hai pareshan baDi mushkil se

dhaar talwar ki thi jada-e-barik na tha

hai hua hashr ka maidan baDi mushkil se

rahte hain aise hi insan farishte ban kar

aadmi bante hain insan baDi mushkil se

dil-e-bismil mein kuchh is tarah hue the paiwast

TuT kar nikle hain paikan baDi mushkil se

yahi andaz yahi waza jo rakkhoge 'riyaz'

log samjhenge musalman baDi mushkil se