jaan tan ka sath de na to dil hi wafa kare

jaañ tan kā saath de na to dil hī vafā kare

kyā rah gayā hai jis kā koī tazkira kare

sab dekh sun chukā magar ab bhī safar meñ huuñ

qadmoñ ko kaun rāhguzar se judā kare

āshuftagī kā merī pata de mirā mazār

ik gard-bād roz vahāñ se uThā kare

muddat huī ki bhuul gayā mujh ko shahr-e-yār

chup lag ga.ī mujhe to vo bechāra kyā kare

tark-e-safar pe raah se ye bad-duā milī

bistar meñ tere paañv kā talvā jalā kare

sakta sā lag gayā hai mire yaar ko 'suhail'

āñkheñ haiñ ashk-bār na dil hī duā kare

jaan tan ka sath de na to dil hi wafa kare

kya rah gaya hai jis ka koi tazkira kare

sab dekh sun chuka magar ab bhi safar mein hun

qadmon ko kaun rahguzar se juda kare

aashuftagi ka meri pata de mera mazar

ek gard-baad roz wahan se uTha kare

muddat hui ki bhul gaya mujh ko shahr-e-yar

chup lag gai mujhe to wo bechaara kya kare

tark-e-safar pe rah se ye bad-dua mili

bistar mein tere panw ka talwa jala kare

sakta sa lag gaya hai mere yar ko 'suhail'

aankhen hain ashk-bar na dil hi dua kare