جانے کس عالم احساس میں کھوئے ہوئے ہیں

جانے کس عالم احساس میں کھوئے ہوئے ہیں

ہم ہیں وہ لوگ کہ جاگے ہیں نہ سوئے ہوئے ہیں

اپنے انجام کا دیکھے گا تماشا کبھی وہ

جیتے جی ہم تو ابھی سے اسے روئے ہوئے ہیں

داغ مٹتا نہیں کچھ اور نمایاں ہوا ہے

اپنے ہاتھ آپ نے کس چیز سے دھوئے ہوئے ہیں

کچھ سمجھ میں نہیں آتا یہ مکافات عمل

کاٹتے کیوں نہیں جو آپ نے بوئے ہوئے ہیں

روح اپنی رہی ہے قرب بدن سے سرشار

ہم فرشتے نہیں دامن کو بھگوئے ہوئے ہیں

سانس لینے کو بھی اب ان کی طرف دیکھتا ہوں

نوک نشتر جو رگ جاں میں چبھوئے ہوئے ہیں

کیا ملا ان سے ہمیں خاک ندامت کے سوا

ہم بھی کن خوابوں کی تعبیر کو ڈھوئے ہوئے ہیں

اتنے ناداں بھی نہیں ہم کہ سمجھ بھی نہ سکیں

آپ لہجے میں جو شیرینی سموئے ہوئے ہیں