jaane kis ummid pe chhoD aae the ghar-bar log

jaane kis ummīd pe chhoḌ aa.e the ghar-bār log

nafratoñ kī shaam yaad aa.e purāne yaar log

vo to kahiye aap kī ḳhushbū ne pahchānā mujhe

itr kah kar jaane kyā kyā bechte attār log

pahle māñgīñ sar-bulandī kī duā.eñ ishq meñ

phir havas kī chākarī karne lage bīmār log

aap kī sāda-dilī se tañg aa jaatā huuñ maiñ

mere dil meñ rah chuke haiñ is qadar hushyār log

is javāñ-mardī ke sadqe jā.iye har baat par

sar kaTāne ke liye rahte haiñ ab tayyār log

phailtā hī jā rahā hai din-ba-din sahrā-e-ishq

ḳhaak uḌāte phir rahe haiñ sab ke sab bekār log

bādshāhat ho na ho lekin bharam qaa.em rahe

har ghaḌī ghere hue baiThe raheñ do-chār log

jaane kis ummid pe chhoD aae the ghar-bar log

nafraton ki sham yaad aae purane yar log

wo to kahiye aap ki KHushbu ne pahchana mujhe

itr kah kar jaane kya kya bechte attar log

pahle mangin sar-bulandi ki duaen ishq mein

phir hawas ki chaakari karne lage bimar log

aap ki sada-dili se tang aa jata hun main

mere dil mein rah chuke hain is qadar hushyar log

is jawan-mardi ke sadqe jaiye har baat par

sar kaTane ke liye rahte hain ab tayyar log

phailta hi ja raha hai din-ba-din sahra-e-ishq

KHak uDate phir rahe hain sab ke sab bekar log

baadshahat ho na ho lekin bharam qaem rahe

har ghaDi ghere hue baiThe rahen do-chaar log