jate ho tum jo ruTh ke jate hain ji se hum

jaate ho tum jo ruuTh ke jaate haiñ jī se ham

tum kyā ḳhafā ho ḳhud haiñ ḳhafā zindagī se ham

kuchh aise bad-havās haiñ dil kī lagī se ham

kahte haiñ mudda.ā-e-dil mudda.ī se ham

be-zār ho chuke haiñ bahut dil-lagī se ham

bas ho to umr bhar na mileñ ab kisī se ham

ye jānte to shikve na karte raqīb ke

kahte haiñ terī zid se mileñge usī se ham

mujrim hai kaun donoñ meñ insāf kījiye

chhup chhup ke aap milte haiñ yā mudda.ī se ham

ham aur chaah ġhair kī allāh se Daro

milte haiñ tum se bhī to tumhārī ḳhushī se ham

jate ho tum jo ruTh ke jate hain ji se hum

tum kya KHafa ho KHud hain KHafa zindagi se hum

kuchh aise bad-hawas hain dil ki lagi se hum

kahte hain muddaa-e-dil muddai se hum

be-zar ho chuke hain bahut dil-lagi se hum

bas ho to umr bhar na milen ab kisi se hum

ye jaante to shikwe na karte raqib ke

kahte hain teri zid se milenge usi se hum

mujrim hai kaun donon mein insaf kijiye

chhup chhup ke aap milte hain ya muddai se hum

hum aur chah ghair ki allah se Daro

milte hain tum se bhi to tumhaari KHushi se hum