jab adhure chand ki parchhain pani par paDi

jab adhūre chāñd kī parchhā.īñ paanī par paḌī

raushnī ik nā-mukammal sī kahānī par paḌī

dhuup ne kachche phaloñ meñ dard kā ras bhar diyā

ishq kī uftād nā-puḳhta javānī par paḌī

gard ḳhāmoshī kī sab mere dahan se dhul ga.ī

is qadar bārish suḳhan kī be-zabānī par paḌī

us ne apne qasr se kab jhāñk kar dekhā hameñ

kab nazar us kī hamārī be-makānī par paḌī

asl sone par thā jitnā bhī mulamma.a jal gayā

dhuup us shiddat kī alfāz-o-ma.ānī par paḌī

tark kiije ab diloñ meñ narm goshoñ kī talāsh

be-hisī kī ḳhaak harf-e-mehrbānī par paḌī

zaḳhm-e-dil us kī tavāzo.a meñ namakdāñ ban gayā

ye musībat bhī hamārī mezbānī par paḌī

apne hāthoñ TūTne kā tajraba to ho gayā

choT be-shak saḳht thī jo ḳhush-gumānī par paḌī

jab adhure chand ki parchhain pani par paDi

raushni ek na-mukammal si kahani par paDi

dhup ne kachche phalon mein dard ka ras bhar diya

ishq ki uftad na-puKHta jawani par paDi

gard KHamoshi ki sab mere dahan se dhul gai

is qadar barish suKHan ki be-zabani par paDi

us ne apne qasr se kab jhank kar dekha hamein

kab nazar us ki hamari be-makani par paDi

asl sone par tha jitna bhi mulamma jal gaya

dhup us shiddat ki alfaz-o-maani par paDi

tark kije ab dilon mein narm goshon ki talash

be-hisi ki KHak harf-e-mehrbani par paDi

zaKHm-e-dil us ki tawazoa mein namakdan ban gaya

ye musibat bhi hamari mezbani par paDi

apne hathon TuTne ka tajraba to ho gaya

choT be-shak saKHt thi jo KHush-gumani par paDi