jab bhi apne sar se apna qad siwa lagne lage

jab bhī apne sar se apnā qad sivā lagne lage

mat samajh lenā ki tum sab ko ḳhudā lagne lage

tū mirī āvāz meñ kyoñ is tarah shāmil huā

maiñ kisī ko duuñ sadā terī sadā lagne lage

us ke chehre par jo paḌ jaa.e tire chehre kā 'aks

shāḳh se TuuTā huā pattā harā lagne lage

is qadar nafrat hai mere bhā.iyoñ ke zehn meñ

mere haq kā zahr bhī un ko davā lagne lage

maañ tire mamtā bhare hoñToñ meñ vo tāsīr hai

bad-du'ā bhī tere hoñToñ kī du'ā lagne lage

dekh kar ham ko kabhī muñh pherte haiñ ḳhauf se

is kā matlab hai ki ham bhī aa.ina lagne lage

vaqt achchhā ho to dushman sā ye ban kar saath de

vaqt paḌ jaa.e to saaya bhī judā lagne lage

maiñ ne shīshoñ kī tijārat is liye to kī na thī

pattharoñ ko ḳhud mirā chehrā burā lagne lage

jab bhi apne sar se apna qad siwa lagne lage

mat samajh lena ki tum sab ko KHuda lagne lage

tu meri aawaz mein kyon is tarah shamil hua

main kisi ko dun sada teri sada lagne lage

us ke chehre par jo paD jae tere chehre ka 'aks

shaKH se TuTa hua patta hara lagne lage

is qadar nafrat hai mere bhaiyon ke zehn mein

mere haq ka zahr bhi un ko dawa lagne lage

man tere mamta bhare honTon mein wo tasir hai

bad-du'a bhi tere honTon ki du'a lagne lage

dekh kar hum ko kabhi munh pherte hain KHauf se

is ka matlab hai ki hum bhi aaina lagne lage

waqt achchha ho to dushman sa ye ban kar sath de

waqt paD jae to saya bhi juda lagne lage

main ne shishon ki tijarat is liye to ki na thi

pattharon ko KHud mera chehra bura lagne lage