jab kaha tir teri aankh ne aksar mara

jab kahā tiir tirī aañkh ne aksar maarā

chitvaneñ pher ke bole ki barābar maarā

qadr kuchh bhī mire dil kī but-e-kāfir ne na kī

zulf-e-pechāñ se jo uljhā to mire sar maarā

jaan be-maut ḳhudā bhī nahīñ letā lekin

tū ne be-maut hī logoñ ko sitamgar maarā

chand zarre merī miTTī ke faqat haath aa.e

dasht-e-ġhurbat ke bagūloñ ne jo chakkar maarā

ik musalmān kā dil toḌ diyā kyā kahnā

apne nazdīk baḌā aap ne kāfar maarā

'muztar' aisā koī ab tak na huā aur na ho

maut ne haa.e 'abas dāġh-e-suḳhanavar maarā

jab kaha tir teri aankh ne aksar mara

chitwanen pher ke bole ki barabar mara

qadr kuchh bhi mere dil ki but-e-kafir ne na ki

zulf-e-pechan se jo uljha to mere sar mara

jaan be-maut KHuda bhi nahin leta lekin

tu ne be-maut hi logon ko sitamgar mara

chand zarre meri miTTi ke faqat hath aae

dasht-e-ghurbat ke bagulon ne jo chakkar mara

ek musalman ka dil toD diya kya kahna

apne nazdik baDa aap ne kafar mara

'muztar' aisa koi ab tak na hua aur na ho

maut ne hae 'abas dagh-e-suKHanawar mara