jab majma-e-KHuban hota hai diwane bahut ho jate hain

jab majma.a-e-ḳhūbāñ hotā hai dīvāne bahut ho jaate haiñ

jab sham.a-e-tajallī raushan ho parvāne bahut ho jaate haiñ

parvāne TuuT ke girte haiñ parvāne bahut ho jaate haiñ

jab chāñd gahan se khultā hai dīvāne bahut ho jaate haiñ

kahte hue maiñ kuchh Dartā huuñ rūdād-e-mohabbat ko apnī

duniyā-e-mohabbat meñ aise afsāne bahut ho jaate haiñ

kyoñ husn pe vo maġhrūr na hoñ is husn-e-javānī meñ apnī

dīvānoñ kī parvā kaun kare dīvāne bahut ho jaate haiñ

har samt ghaTā chhā jaatī hai har shai se barastī hai mastī

jab abr-e-karam chhā jaatā hai mastāne bahut ho jaate haiñ

mai-kash ke liye shīsha na sahī sāġhar na sahī miinā na sahī

piine kā irāda jab kar le paimāne bahut ho jaate haiñ

ārā.ish-e-mahfil ho ki na ho sāmān-e-tarab kuchh ho ki na ho

jab sham-e-mohabbat jaltī hai parvāne bahut ho jaate haiñ

jab kaalī ghaTā.eñ chhātī haiñ aur jaam ko gardish hotī hai

piine ke liye maiḳhāne meñ mastāne bahut ho jaate haiñ

ai josh-e-junūñ vo haal batā vo dekh ke vahshī ḳhud hī kaheñ

kahne ke liye to ulfat meñ dīvāne bahut ho jaate haiñ

vo pahlū meñ jis dam hote haiñ ik be-ḳhudī taarī hotī hai

kyā haal kaheñ is haal se ham begāne bahut ho jaate haiñ

ham is kī haqīqat ko ab tak āsān samajhte the lekin

ai 'rāz' ye rāz-e-husn hai kyā dīvāne bahut ho jaate haiñ

jab majma-e-KHuban hota hai diwane bahut ho jate hain

jab shama-e-tajalli raushan ho parwane bahut ho jate hain

parwane TuT ke girte hain parwane bahut ho jate hain

jab chand gahan se khulta hai diwane bahut ho jate hain

kahte hue main kuchh Darta hun rudad-e-mohabbat ko apni

duniya-e-mohabbat mein aise afsane bahut ho jate hain

kyon husn pe wo maghrur na hon is husn-e-jawani mein apni

diwanon ki parwa kaun kare diwane bahut ho jate hain

har samt ghaTa chha jati hai har shai se barasti hai masti

jab abr-e-karam chha jata hai mastane bahut ho jate hain

mai-kash ke liye shisha na sahi saghar na sahi mina na sahi

pine ka irada jab kar le paimane bahut ho jate hain

aaraish-e-mahfil ho ki na ho saman-e-tarab kuchh ho ki na ho

jab sham-e-mohabbat jalti hai parwane bahut ho jate hain

jab kali ghaTaen chhati hain aur jam ko gardish hoti hai

pine ke liye maiKHane mein mastane bahut ho jate hain

ai josh-e-junun wo haal bata wo dekh ke wahshi KHud hi kahen

kahne ke liye to ulfat mein diwane bahut ho jate hain

wo pahlu mein jis dam hote hain ek be-KHudi tari hoti hai

kya haal kahen is haal se hum begane bahut ho jate hain

hum is ki haqiqat ko ab tak aasan samajhte the lekin

ai 'raaz' ye raaz-e-husn hai kya diwane bahut ho jate hain