jab rone baiThta hun tab kya kasar rahe hai

jab rone baiThtā huuñ tab kyā kasar rahe hai

rūmāl do do din tak juuñ abr tar rahe hai

āh-e-sahar kī merī barchhī ke vasvase se

ḳhurshīd ke muñh uupar aksar sipar rahe hai

aagah to rahiye us kī tarz-e-rah-o-ravish se

aane meñ us ke lekin kis ko ḳhabar rahe hai

un rozoñ itnī ġhaflat achchhī nahīñ idhar se

ab iztirāb ham ko do do pahr rahe hai

āb-e-hayāt kī sī saarī ravish hai us kī

par jab vo uTh chale hai ek aadh mar rahe hai

talvār ab lagā hai be-Dol paas rakhne

ḳhuun aaj kal kisū kā vo shoḳh kar rahe hai

dar se kabhū jo aate dekhā hai maiñ ne us ko

tab se udhar hī aksar merī nazar rahe hai

āḳhir kahāñ talak ham ik roz ho chukeñge

barsoñ se va.ada-e-shab har sub.h par rahe hai

'mīr' ab bahār aa.ī sahrā meñ chal junūñ kar

koī bhī fasl-e-gul meñ nādān ghar rahe hai

jab rone baiThta hun tab kya kasar rahe hai

rumal do do din tak jun abr tar rahe hai

aah-e-sahar ki meri barchhi ke waswase se

KHurshid ke munh upar aksar sipar rahe hai

aagah to rahiye us ki tarz-e-rah-o-rawish se

aane mein us ke lekin kis ko KHabar rahe hai

un rozon itni ghaflat achchhi nahin idhar se

ab iztirab hum ko do do pahr rahe hai

aab-e-hayat ki si sari rawish hai us ki

par jab wo uTh chale hai ek aadh mar rahe hai

talwar ab laga hai be-Dol pas rakhne

KHun aaj kal kisu ka wo shoKH kar rahe hai

dar se kabhu jo aate dekha hai main ne us ko

tab se udhar hi aksar meri nazar rahe hai

aaKHir kahan talak hum ek roz ho chukenge

barson se wada-e-shab har subh par rahe hai

'mir' ab bahaar aai sahra mein chal junun kar

koi bhi fasl-e-gul mein nadan ghar rahe hai