jab se bandha hai tasawwur us ruKH-e-pur-nur ka

jab se bāñdhā hai tasavvur us ruḳh-e-pur-nūr kā

saare ghar meñ nuur phailā hai charāġh-e-tūr kā

baḳht-e-vāzhūñ se jale kyuuñ dil na mujh mahrūr kā

marham-e-kāfūr se muñh aa gayā nāsūr kā

is qadar mushtāq huuñ zāhid ḳhudā ke nuur kā

but bhī banvāyā kabhī maiñ ne to sañg-e-tūr kā

tujh ko laa.e ghar meñ jannat ko jalāyā rashk se

ham-baġhal tujh se hue pahlū dabāyā huur kā

gor-e-kāfir kis liye hai tīra-o-tār is qadar

paḌ gayā saaya magar merī shab-e-dījūr kā

husn-e-yūsuf aur tere husn meñ itnā hai farq

choT ye nazdīk kī hai vaar thā vo daur kā

qasr-e-tan bigḌā kisī kā gorkan kī ban paḌī

ghar kisī kā gir paḌā ghar bin gayā mazdūr kā

chehra-e-jānāñ se sharmā kar chhupāyā ḳhuld meñ

ḳhāma-e-taqdīr ne khīñchā jo naqsha huur kā

hājat-e-mushshāta kyā ruḳhsār-e-raushan ke liye

dekh lo gul kāTtā hai kaun sham-e-tūr kā

zulf-o-rū-e-yār se nairañg-e-qudrat hai ayaañ

mahr ke panje meñ hai dāman shab-e-dījūr kā

ḳhāksārī kar jo ho manzūr āñkhoñ meñ jagah

ḳhaak ho kar surma bin jaatā hai patthar taur kā

ġhāfiloñ ke kaan kab khulte haiñ san kar shor-e-hashr

sone vāloñ ko jagā saktā nahīñ ġhul duur kā

pūchh lenā sab vatan kā haal ai ahl-e-adam

baiTh lene do zarā aatā huuñ uTThā daur kā

ijz karte haiñ adū-e-jān se bhī ḳhāsān-e-haq

jhuk gayā sar aage pā-e-dār par mansūr kā

maut kyā aa.ī tap-e-furqat se sehat ho ga.ī

dam nikalne se badan ThanDā huā ranjūr kā

jaate haiñ mai-ḳhāna-e-ālam se ham sū-e-adam

kah do az-ḳhud-raftagī se hai irāda duur kā

mūziyoñ ko hādsoñ se dahr ke kyā ḳhauf hai

bārish-e-bārāñ se ghar girtā nahīñ zambūr kā

chashm-e-sāġhar be-sabab har dam lahū rotī nahīñ

muġhbachoñ se sāqiyā dil phaT gayā añgūr kā

jaate haiñ mai-ḳhāna-e-ālam se ham sū-e-adam

kah do az-ḳhud-raftagī se hai irāda duur kā

kī nazar jis par kudūrat se rahā ḳhāmosh vo

hai asar gard-e-nigāh-e-yār meñ sindūr kā

jalva-e-māshūq har jā hai basīrat ho agar

kirmak-e-shab-tāb meñ aalam hai sham-e-tūr kā

mar ke yārān-e-adam ke paas pahuñchūñgā 'amīr'

chalte chalte jaan jā.egī safar hai duur kā

jab se bandha hai tasawwur us ruKH-e-pur-nur ka

sare ghar mein nur phaila hai charagh-e-tur ka

baKHt-e-wazhun se jale kyun dil na mujh mahrur ka

marham-e-kafur se munh aa gaya nasur ka

is qadar mushtaq hun zahid KHuda ke nur ka

but bhi banwaya kabhi main ne to sang-e-tur ka

tujh ko lae ghar mein jannat ko jalaya rashk se

ham-baghal tujh se hue pahlu dabaya hur ka

gor-e-kafir kis liye hai tira-o-tar is qadar

paD gaya saya magar meri shab-e-dijur ka

husn-e-yusuf aur tere husn mein itna hai farq

choT ye nazdik ki hai war tha wo daur ka

qasr-e-tan bigDa kisi ka gorkan ki ban paDi

ghar kisi ka gir paDa ghar bin gaya mazdur ka

chehra-e-jaanan se sharma kar chhupaya KHuld mein

KHama-e-taqdir ne khincha jo naqsha hur ka

hajat-e-mushshata kya ruKHsar-e-raushan ke liye

dekh lo gul kaTta hai kaun sham-e-tur ka

zulf-o-ru-e-yar se nairang-e-qudrat hai ayan

mahr ke panje mein hai daman shab-e-dijur ka

KHaksari kar jo ho manzur aankhon mein jagah

KHak ho kar surma bin jata hai patthar taur ka

ghafilon ke kan kab khulte hain san kar shor-e-hashr

sone walon ko jaga sakta nahin ghul dur ka

puchh lena sab watan ka haal ai ahl-e-adam

baiTh lene do zara aata hun uTTha daur ka

ijz karte hain adu-e-jaan se bhi KHasan-e-haq

jhuk gaya sar aage pa-e-dar par mansur ka

maut kya aai tap-e-furqat se sehat ho gai

dam nikalne se badan ThanDa hua ranjur ka

jate hain mai-KHana-e-alam se hum su-e-adam

kah do az-KHud-raftagi se hai irada dur ka

muziyon ko hadson se dahr ke kya KHauf hai

barish-e-baran se ghar girta nahin zambur ka

chashm-e-saghar be-sabab har dam lahu roti nahin

mughbachon se saqiya dil phaT gaya angur ka

jate hain mai-KHana-e-alam se hum su-e-adam

kah do az-KHud-raftagi se hai irada dur ka

ki nazar jis par kudurat se raha KHamosh wo

hai asar gard-e-nigah-e-yar mein sindur ka

jalwa-e-mashuq har ja hai basirat ho agar

kirmak-e-shab-tab mein aalam hai sham-e-tur ka

mar ke yaran-e-adam ke pas pahunchunga 'amir'

chalte chalte jaan jaegi safar hai dur ka