jab shab-e-furqat ki tariki se ghabraata hun main

jab shab-e-furqat kī tārīkī se ghabrātā huuñ maiñ

terī yādoñ se dil-e-muztar ko bahlātā huuñ maiñ

jab kisī zohrā-jabīñ ko sāmne paatā huuñ maiñ

hosh kī har dastaras se duur ho jaatā huuñ maiñ

ārzūeñ laakh hotī haiñ mire dil meñ magar

sāmne aate ho jab tum kuchh na kah paatā huuñ maiñ

sust-rau hotī hai jab rāh-e-talab meñ justujū

sho.ala-e-azm-o-amal se dil ko garmātā huuñ maiñ

chhoḌ de us be-muravvat kī tamannā chhoḌ de

rāt-din ye baat apne dil ko samjhātā huuñ maiñ

jab kabhī guzre dinoñ kī yaad aatī hai mujhe

dil taḌaptā hai mirā aur ashk barsātā huuñ maiñ

sāġhar-e-sahbā se 'nayyar' kyā ġharaz mujh ko bhalā

pī ke un kī mai-fishāñ nazroñ se lahrātā huuñ maiñ

jab shab-e-furqat ki tariki se ghabraata hun main

teri yaadon se dil-e-muztar ko bahlata hun main

jab kisi zohra-jabin ko samne pata hun main

hosh ki har dastaras se dur ho jata hun main

aarzuen lakh hoti hain mere dil mein magar

samne aate ho jab tum kuchh na kah pata hun main

sust-rau hoti hai jab rah-e-talab mein justuju

shoala-e-azm-o-amal se dil ko garmata hun main

chhoD de us be-murawwat ki tamanna chhoD de

raat-din ye baat apne dil ko samjhata hun main

jab kabhi guzre dinon ki yaad aati hai mujhe

dil taDapta hai mera aur ashk barsata hun main

saghar-e-sahba se 'nayyar' kya gharaz mujh ko bhala

pi ke un ki mai-fishan nazron se lahraata hun main