jab tak zamin pe rengte sae rahenge hum

jab tak zamīñ pe reñgte saa.e raheñge ham

sūraj kā bojh sar pe uThā.e raheñge ham

khul kar baras hī jaa.eñ ki ThanDī ho dil kī aag

kab tak ḳhalā meñ paañv jamā.e raheñge ham

jhāñkegā ā.inoñ se koī aur jab talak

hāthoñ meñ sang-o-ḳhisht uThā.e raheñge ham

ik naqsh-e-pā kī tarah sahī is zamīn par

apnī bhī ek raah banā.e raheñge ham

jab tak na shāḳh shāḳh ke sar par ho tāj-e-gul

kāñToñ kā taaj sar pe sajā.e raheñge ham

jab tak zamin pe rengte sae rahenge hum

suraj ka bojh sar pe uThae rahenge hum

khul kar baras hi jaen ki ThanDi ho dil ki aag

kab tak KHala mein panw jamae rahenge hum

jhankega aainon se koi aur jab talak

hathon mein sang-o-KHisht uThae rahenge hum

ek naqsh-e-pa ki tarah sahi is zamin par

apni bhi ek rah banae rahenge hum

jab tak na shaKH shaKH ke sar par ho taj-e-gul

kanTon ka taj sar pe sajae rahenge hum