jab to main hun aah mein aisa asar paida karun

jab to maiñ huuñ aah meñ aisā asar paidā karūñ

ai sitamgar tere dil meñ apnā ghar paidā karūñ

yaañ to ye aadat hai kis kis kā karegā tū ilaaj

roz bīmārī se maiñ do chaar agar paidā karūñ

ye taġhāful vasl kī shab pūchhte haiñ merā haal

ab duā.eñ maañg kar dard-e-jigar paidā karūñ

aañkh uThā kar jis taraf dekhūñ vahī aa.e nazar

aañkh vo paidā karūñ aur vo nazar paidā karūñ

fikr se īzāoñ kī ulTī sunā jaa.e haiñ ġhair

aisā dil paidā karūñ aur vo jigar paidā karūñ

jo tumheñ manzūr hai vo kah na do kyuuñ chup raho

phir ḳhatā merī koī hujjat agar paidā karūñ

terī furqat maiñ gavārā kar sakūñgā kis tarah

kis kā dil lā.ūñ kahāñ se ye jigar paidā karūñ

haa.e dil ranjish kā sadma ek-dam uThtā nahīñ

ḳhud manā.eñ vo maiñ itnī baat gar paidā karūñ

kuchh rukā dekhā jo mujh ko to sunā kar ye kahā

ye to achchhī Thahrī ab logoñ kā Dar paidā karūñ

maiñ hī huuñ mujh sā agar DhūñDo jahāñ meñ mubtalā

tū hī ho tujh sā hasīñ duniyā meñ gar paidā karūñ

achchhā achchhā dar ko kar lo band mujh ko dekh kar

sar ko Takrā.ūñ abhī dīvār-o-dar paidā karūñ

sab kuchh aatā hai magar yaañ aql hairāñ hai mirī

tere dil meñ rah kyūñ-kar fitnagar paidā karūñ

ab tirī jhūTī lagāvaT meñ na ā.ūñgā kabhī

muft iizā pā.ūñ nāhaq dard-e-sar paidā karūñ

kahte haiñ kyā tujh pe guzrī thī mire jaane ke ba.ad

kyā batā.ūñ kaise vo vaqt-e-sahar paidā karūñ

kyuuñ 'nizām' us vaqt to tum maan jāoge mujhe

dostī us dushman-e-jāñ se agar paidā karūñ

jab to main hun aah mein aisa asar paida karun

ai sitamgar tere dil mein apna ghar paida karun

yan to ye aadat hai kis kis ka karega tu ilaj

roz bimari se main do chaar agar paida karun

ye taghaful wasl ki shab puchhte hain mera haal

ab duaen mang kar dard-e-jigar paida karun

aankh uTha kar jis taraf dekhun wahi aae nazar

aankh wo paida karun aur wo nazar paida karun

fikr se izaon ki ulTi suna jae hain ghair

aisa dil paida karun aur wo jigar paida karun

jo tumhein manzur hai wo kah na do kyun chup raho

phir KHata meri koi hujjat agar paida karun

teri furqat main gawara kar sakunga kis tarah

kis ka dil laun kahan se ye jigar paida karun

hae dil ranjish ka sadma ek-dam uThta nahin

KHud manaen wo main itni baat gar paida karun

kuchh ruka dekha jo mujh ko to suna kar ye kaha

ye to achchhi Thahri ab logon ka Dar paida karun

main hi hun mujh sa agar DhunDo jahan mein mubtala

tu hi ho tujh sa hasin duniya mein gar paida karun

achchha achchha dar ko kar lo band mujh ko dekh kar

sar ko Takraun abhi diwar-o-dar paida karun

sab kuchh aata hai magar yan aql hairan hai meri

tere dil mein rah kyun-kar fitnagar paida karun

ab teri jhuTi lagawaT mein na aaunga kabhi

muft iza paun nahaq dard-e-sar paida karun

kahte hain kya tujh pe guzri thi mere jaane ke baad

kya bataun kaise wo waqt-e-sahar paida karun

kyun 'nizam' us waqt to tum man jaoge mujhe

dosti us dushman-e-jaan se agar paida karun