jab tumhein yaad kiya ranj hua bhul gae

jab tumheñ yaad kiyā rañj huā bhuul ga.e

ham añdheroñ meñ ujāle kī fazā bhuul ga.e

tum se bichhḌe the to jiine kā chalan yaad na thā

tum ko dekhā hai to marne kī duā bhuul ga.e

tere aañsū the ki be-dāġh sitāroñ ke charāġh

umr-bhar ke liye ham apnī sazā bhuul ga.e

ham ḳhayāloñ meñ tumheñ yaad kiye jaate haiñ

aur tum dil ke dhaḌakne kī sadā bhuul ga.e

pyaar meñ koī fasīleñ jo uThā.e bhī to kyā

tum to ḳhud lazzat-e-uslūb-e-vafā bhuul ga.e

kisī mahkī huī chhāñv meñ Thahar ke ham bhī

sañg-dil vaqt kā andāz-e-jafā bhuul ga.e

kitne nādān haiñ vo ahl-e-mohabbat 'jāzib'

jo har ik baat mohabbat ke sivā bhuul ga.e

jab tumhein yaad kiya ranj hua bhul gae

hum andheron mein ujale ki faza bhul gae

tum se bichhDe the to jine ka chalan yaad na tha

tum ko dekha hai to marne ki dua bhul gae

tere aansu the ki be-dagh sitaron ke charagh

umr-bhar ke liye hum apni saza bhul gae

hum KHayalon mein tumhein yaad kiye jate hain

aur tum dil ke dhaDakne ki sada bhul gae

pyar mein koi fasilen jo uThae bhi to kya

tum to KHud lazzat-e-uslub-e-wafa bhul gae

kisi mahki hui chhanw mein Thahar ke hum bhi

sang-dil waqt ka andaz-e-jafa bhul gae

kitne nadan hain wo ahl-e-mohabbat 'jazib'

jo har ek baat mohabbat ke siwa bhul gae