jab wo lab-e-nazuk se kuchh irshad karenge

jab vo lab-e-nāzuk se kuchh irshād kareñge

ham ai dil-e-marhūm tujhe yaad kareñge

ab to ye taqāze haiñ kisī dushman-e-jāñ ke

tum uf na karoge bhī to bedād kareñge

ham aap jalā leñge sarishk-e-sar-e-mizhgāñ

ab aap kahāñ tak sitam ījād kareñge

ik dil ke ujaḌ jaane kā ġham ho to kahāñ tak

aao ki ġham-e-dil hī ko ābād kareñge

ham ahl-e-vafā terī jafāoñ pe jo chup haiñ

jī leñge to apne hī se fariyād kareñge

ye mez ye kursī ye kitābeñ ye khulā-pan

chup chup se kisī shaḳhs ko sab yaad kareñge

jab wo lab-e-nazuk se kuchh irshad karenge

hum ai dil-e-marhum tujhe yaad karenge

ab to ye taqaze hain kisi dushman-e-jaan ke

tum uf na karoge bhi to bedad karenge

hum aap jala lenge sarishk-e-sar-e-mizhgan

ab aap kahan tak sitam ijad karenge

ek dil ke ujaD jaane ka gham ho to kahan tak

aao ki gham-e-dil hi ko aabaad karenge

hum ahl-e-wafa teri jafaon pe jo chup hain

ji lenge to apne hi se fariyaad karenge

ye mez ye kursi ye kitaben ye khula-pan

chup chup se kisi shaKHs ko sab yaad karenge