jaga junun ko zara naqsha-e-muqaddar khinch

jagā junūñ ko zarā naqsha-e-muqaddar khīñch

na.ī sadī ko na.ī karbalā se bāhar khīñch

maiñ zehnī taur pe āvāra hotā jaatā huuñ

mire shu.ūr mujhe apnī had ke andar khīñch

na.ī zamīn lahū kā ḳhirāj letī hai

dayār-e-ġhair meñ bhī ḳhushnumā sā manzar khīñch

udaas raat meñ taare gavāh bante haiñ

rag-e-habāb se tū qātilāna ḳhanjar khīñch

abhī sitāroñ meñ baaqī hai zindagī kī ramaq

kuchh aur der zarā narm garm chādar khīñch

vajūd-e-shahr to jañgal meñ Dhal chukā 'ālam'

ab is jagah se mujhe jānib-e-samundar khīñch

jaga junun ko zara naqsha-e-muqaddar khinch

nai sadi ko nai karbala se bahar khinch

main zehni taur pe aawara hota jata hun

mere shuur mujhe apni had ke andar khinch

nai zamin lahu ka KHiraj leti hai

dayar-e-ghair mein bhi KHushnuma sa manzar khinch

udas raat mein tare gawah bante hain

rag-e-habab se tu qatilana KHanjar khinch

abhi sitaron mein baqi hai zindagi ki ramaq

kuchh aur der zara narm garm chadar khinch

wajud-e-shahr to jangal mein Dhal chuka 'alam'

ab is jagah se mujhe jaanib-e-samundar khinch