jahan-e-fikr mein misl-e-hawa chalta raha hun main

jahān-e-fikr meñ misl-e-havā chaltā rahā huuñ maiñ

liye gard-e-ḳhirad chāroñ dishā chaltā rahā huuñ maiñ

surāġh-e-āgahī ko maiñ koī manzil samajh baiThā

sarāb-e-aql kī jānib sadā chaltā rahā huuñ maiñ

navard-e-kā.enāt-e-nau huuñ lekin ajnabī sā huuñ

mashīnī daur se haT kar zarā chaltā rahā huuñ maiñ

mujhe ta.abīr kī ḳhvāhish thī yā shāyad nahīñ bhī thī

alam ḳhvāboñ kā le kar jā-ba-jā chaltā rahā huuñ maiñ

agar maiñ chhoḌ detā dil kabhī kā bujh gayā hotā

jalā kar tīrgī meñ ye diyā chaltā rahā huuñ maiñ

thakan ne aa liyā thā jism tab socheñ tavānā thiiñ

jahāñ meñ ruk gayā thā ye ḳhalā chaltā rahā huuñ maiñ

balā kī gardisheñ thiiñ soch meñ jo chhā ga.iiñ mujh par

banā ke zindagī ko dā.era chaltā rahā huuñ maiñ

abhī kitne marāhil aur haiñ merī masāfat ke

mujhe kuchh to batā de ai ḳhudā chaltā rahā huuñ maiñ

jahan-e-fikr mein misl-e-hawa chalta raha hun main

liye gard-e-KHirad chaaron disha chalta raha hun main

suragh-e-agahi ko main koi manzil samajh baiTha

sarab-e-aql ki jaanib sada chalta raha hun main

naward-e-kaenat-e-nau hun lekin ajnabi sa hun

mashini daur se haT kar zara chalta raha hun main

mujhe tabir ki KHwahish thi ya shayad nahin bhi thi

alam KHwabon ka le kar ja-ba-ja chalta raha hun main

agar main chhoD deta dil kabhi ka bujh gaya hota

jala kar tirgi mein ye diya chalta raha hun main

thakan ne aa liya tha jism tab sochen tawana thin

jahan mein ruk gaya tha ye KHala chalta raha hun main

bala ki gardishen thin soch mein jo chha gain mujh par

bana ke zindagi ko daera chalta raha hun main

abhi kitne marahil aur hain meri masafat ke

mujhe kuchh to bata de ai KHuda chalta raha hun main