jaise hoti aai hai waise basar ho jaegi

jaise hotī aa.ī hai vaise basar ho jā.egī

zindagī ab muḳhtasar se muḳhtasar ho jā.egī

gesu-e-aks-e-shab-e-furqat pareshāñ ab bhī hai

ham bhī to dekheñ ki yuuñ kyūñkar sahar ho jā.egī

intizār-e-manzil-e-mauhūm kā hāsil ye hai

ek din ham par ināyat kī nazar ho jā.egī

sochtā rahtā hai dil ye sāhil-e-ummīd par

justujū ā.īna-e-madd-o-jazar ho jā.egī

dard ke mushtāq gustāḳhī to hai lekin muaaf

ab duā andesha ye hai kārgar ho jā.egī

saañs ke āġhosh meñ har saañs kā naġhma ye hai

ek din ummīd hai un ko ḳhabar ho jā.egī

jaise hoti aai hai waise basar ho jaegi

zindagi ab muKHtasar se muKHtasar ho jaegi

gesu-e-aks-e-shab-e-furqat pareshan ab bhi hai

hum bhi to dekhen ki yun kyunkar sahar ho jaegi

intizar-e-manzil-e-mauhum ka hasil ye hai

ek din hum par inayat ki nazar ho jaegi

sochta rahta hai dil ye sahil-e-ummid par

justuju aaina-e-madd-o-jazar ho jaegi

dard ke mushtaq gustaKHi to hai lekin muaf

ab dua andesha ye hai kargar ho jaegi

sans ke aaghosh mein har sans ka naghma ye hai

ek din ummid hai un ko KHabar ho jaegi