jamal-o-husn ki wo anjuman mein kya baiThe

jamāl-o-husn kī vo anjuman meñ kyā baiThe

matā-e-hosh-o-ḳhirad hī ko jo gañvā baiThe

jinheñ adab se ilāqa na fikr-o-fan se lagāo

hamārī bazm meñ aise bhī log aa baiThe

kabhī buzurgoñ se mīrās meñ jo paa.ī thī

vo saarī qadreñ vo tahzīb ham bhulā baiThe

maiñ sochtā huuñ vo insān haiñ ki haivāñ haiñ

haiñ kaun jo na kabhī mil ke ek jā baiThe

unheñ se nām-e-tamaddun ko joḌ rakkhā hai

jo apnī daulat-e-tahzīb bhī luTā baiThe

phir aise ghar meñ ho kyā koī qīmtī sāmān

hasad kī aag se jo apnā ghar jalā baiThe

amīr-e-qāfila ko ho thakan kā jab ehsās

to rāste meñ na kyoñ thak ke qāfila baiThe

unheñ milegā na 'iqbāl' manziloñ kā patā

vo rāhzan hī ko jo rahnumā banā baiThe

jamal-o-husn ki wo anjuman mein kya baiThe

mata-e-hosh-o-KHirad hi ko jo ganwa baiThe

jinhen adab se ilaqa na fikr-o-fan se lagao

hamari bazm mein aise bhi log aa baiThe

kabhi buzurgon se miras mein jo pai thi

wo sari qadren wo tahzib hum bhula baiThe

main sochta hun wo insan hain ki haiwan hain

hain kaun jo na kabhi mil ke ek ja baiThe

unhen se nam-e-tamaddun ko joD rakkha hai

jo apni daulat-e-tahzib bhi luTa baiThe

phir aise ghar mein ho kya koi qimti saman

hasad ki aag se jo apna ghar jala baiThe

amir-e-qafila ko ho thakan ka jab ehsas

to raste mein na kyon thak ke qafila baiThe

unhen milega na 'iqbaal' manzilon ka pata

wo rahzan hi ko jo rahnuma bana baiThe