jazba-e-ishq ajab sair dikhata hai hamein

jazba-e-ishq ajab sair dikhātā hai hameñ

apnī jānib koī khīñche liye jaatā hai hameñ

bazm meñ takte haiñ muñh us kā khaḌe aur vo shoḳh

na uThātā hai kisī ko na biThātā hai hameñ

kyā sitam hai ki tarīq apnā rah-e-ishq meñ aah

koī jis ko nahīñ bhātā vo hī bhātā hai hameñ

is taraqqī meñ tanazzul meñ hai ki juuñ qāmat-e-tifl

āsmāñ umr ghTāne ko baḌhātā hai hameñ

band kar baiThe haiñ ab aañkh jo ham to allāh

nazar aatā jo nahīñ so nazar aatā hai hameñ

ThanDe hone kā bhī tā samjheñ mazā itne liye

charḳh mānind-e-charāġh aah jalātā hai hameñ

ai ḳhushā ye ki vo hañsne ke liye rotā hai

apnī ḳhursandī-e-ḳhātir ko kuḌhātā hai hameñ

mil ke ham us se jo Tuk soveñ to dukh dene ko

baḳht-e-bad ḳhvāb judā.ī kā dikhātā hai hameñ

ham haiñ vo murġh-e-giraftār ki apne par se

vārnā jis ko ki hove vo chhuḌātā hai hameñ

lā ke us shoḳh-e-sitamgar ke do-rañgī ke payām

na hañsātā hai koī ab na rulātā hai hameñ

san se jā baiThte haiñ us ke tasavvur meñ ham aah

bazm-e-ḳhūbāñ meñ koī paas bulātā hai hameñ

mahv-e-nazzāra hoñ kyā ham ki ba-qaul-e-'jur.at'

apnī jānib koī khīñche liye jaatā hai hameñ

jazba-e-ishq ajab sair dikhata hai hamein

apni jaanib koi khinche liye jata hai hamein

bazm mein takte hain munh us ka khaDe aur wo shoKH

na uThata hai kisi ko na biThata hai hamein

kya sitam hai ki tariq apna rah-e-ishq mein aah

koi jis ko nahin bhata wo hi bhata hai hamein

is taraqqi mein tanazzul mein hai ki jun qamat-e-tifl

aasman umr ghTane ko baDhata hai hamein

band kar baiThe hain ab aankh jo hum to allah

nazar aata jo nahin so nazar aata hai hamein

ThanDe hone ka bhi ta samjhen maza itne liye

charKH manind-e-charagh aah jalata hai hamein

ai KHusha ye ki wo hansne ke liye rota hai

apni KHursandi-e-KHatir ko kuDhata hai hamein

mil ke hum us se jo Tuk sowen to dukh dene ko

baKHt-e-bad KHwab judai ka dikhata hai hamein

hum hain wo murgh-e-giraftar ki apne par se

warna jis ko ki howe wo chhuData hai hamein

la ke us shoKH-e-sitamgar ke do-rangi ke payam

na hansata hai koi ab na rulata hai hamein

san se ja baiThte hain us ke tasawwur mein hum aah

bazm-e-KHuban mein koi pas bulata hai hamein

mahw-e-nazzara hon kya hum ki ba-qaul-e-'jurat'

apni jaanib koi khinche liye jata hai hamein