jhuki nigah mein hai Dhab pursish-e-nihani ka

jhukī nigah meñ hai Dhab pursish-e-nihānī kā

hayā meñ zor diyā rañg mehrbānī kā

jiye haiñ garm nafas soz se ki bahr-e-charāġh

kare hai shola hī kaam āb-e-zindagānī kā

tabassum-e-lab-e-gunche ko dekh rotā huuñ

ki Thiik rañg hai us ḳhanda-e-nihānī kā

kahāñ se zor-e-dil-o-sīna-o-jigar lā.ūñ

tumheñ to khel lagā haath teġh-rānī kā

ilāhī jaib ki dāman ki āstīñ dho.ūñ

mizha ne siikh liyā shaġhl ḳhūñ-fishānī kā

nahīñ bachā maraz-e-ishq se koī 'mamnūñ'

hameñ dareġh bahut hai tirī javānī kā

jhuki nigah mein hai Dhab pursish-e-nihani ka

haya mein zor diya rang mehrbani ka

jiye hain garm nafas soz se ki bahr-e-charagh

kare hai shola hi kaam aab-e-zindagani ka

tabassum-e-lab-e-gunche ko dekh rota hun

ki Thik rang hai us KHanda-e-nihani ka

kahan se zor-e-dil-o-sina-o-jigar laun

tumhein to khel laga hath tegh-rani ka

ilahi jaib ki daman ki aastin dhoun

mizha ne sikh liya shaghl KHun-fishani ka

nahin bacha maraz-e-ishq se koi 'mamnun'

hamein daregh bahut hai teri jawani ka