ji-daro! dozaKH ki hawa mein kis ki mohabbat jalti hai

jī-dāro! dozaḳh kī havā meñ kis kī mohabbat jaltī hai

tez dahaktī aag zamīñ par ḳhandaq ḳhandaq chaltī hai

āsebī sī sham.eñ le kar sayyāroñ meñ ghuum ga.ī

koī havā aisī hai ki duniyā niiñd meñ uTh kar chaltī hai

kohsāroñ kī barf pighal kar dariyāoñ meñ jā niklī

kuchh to pās-e-āb-e-ravāñ kar nabz-e-junūñ kyā chaltī hai

raat kī raat Thaharne vaale vaqt-e-ḳhush kī baat samajh

sub.h to ik darvāza-e-ġham par duniyā āñkheñ maltī hai

ḳhush-bū shahr-e-badī kā jaadū ek hadīs-e-tilism huī

hauz meñ khiltā gul-e-bakā.ulī ḳhush-bū is meñ paltī hai

qindīl-e-rāhib kā jaadū āsebī tāroñ ke moḌ

kaaT ke vaqt kī ik parchhā.īñ ḳhvāb-numā sī chaltī hai

shams o qamar kī ḳhākistar meñ ruuh thī ik ārā.ish kī

duniyā biich meñ jā ke khaḌī hai aur libās badaltī hai

ḳhākistar dil kī thī āḳhir miltī raakh meñ tāroñ kī

ātish-e-mahr sā jast sā kartī bujhte bujhte jaltī hai

mutrib-e-ḳhush-āvāz huī hai zaḳhm-āvar āhañg-e-balā

vo jo mire hisse kī lai thī tere gale meñ Dhaltī hai

ji-daro! dozaKH ki hawa mein kis ki mohabbat jalti hai

tez dahakti aag zamin par KHandaq KHandaq chalti hai

aasebi si shamen le kar sayyaron mein ghum gai

koi hawa aisi hai ki duniya nind mein uTh kar chalti hai

kohsaron ki barf pighal kar dariyaon mein ja nikli

kuchh to pas-e-ab-e-rawan kar nabz-e-junun kya chalti hai

raat ki raat Thaharne wale waqt-e-KHush ki baat samajh

subh to ek darwaza-e-gham par duniya aankhen malti hai

KHush-bu shahr-e-badi ka jadu ek hadis-e-tilism hui

hauz mein khilta gul-e-bakauli KHush-bu is mein palti hai

qindil-e-rahib ka jadu aasebi taron ke moD

kaT ke waqt ki ek parchhain KHwab-numa si chalti hai

shams o qamar ki KHakistar mein ruh thi ek aaraish ki

duniya bich mein ja ke khaDi hai aur libas badalti hai

KHakistar dil ki thi aaKHir milti rakh mein taron ki

aatish-e-mahr sa jast sa karti bujhte bujhte jalti hai

mutrib-e-KHush-awaz hui hai zaKHm-awar aahang-e-bala

wo jo mere hisse ki lai thi tere gale mein Dhalti hai