jinhen mahfilon se gharaz na thi wo jo qaid apne gharon mein the

jinheñ mahfiloñ se ġharaz na thī vo jo qaid apne gharoñ meñ the

vahī e.atibār-e-zamāna the vahī log dīda-varoñ meñ the

hue haath ab to lahū lahū sar-e-chashm añdherā hai chār-sū

kabhī ham bhī ā.ina-sāz the kabhī ham bhī shīsha-garoñ meñ the

chalī shahr meñ vo havā-e-zar ki ġhubār ban ke ga.e bikhar

vo jo ḳhvāb āñkhoñ meñ the makīñ vo junūñ jo apne saroñ meñ the

mire muhsinoñ meñ haiñ shahr ke ye tavīl-o-āshnā rāste

kahīñ aur jaa.e amaañ na thī ki ġhanīm-e-jāñ to gharoñ meñ the

vahī jin kī teġh se ban gayā mirā shahr maqtal-e-ḳhūñ-fishāñ

sar-e-ām dīda-e-nam liye vahī log nauhagaroñ meñ the

ik udaas bastī meñ vaqt-e-shab maiñ gayā to aise makāñ the sab

na to khiḌkiyoñ meñ the māh-rū na charāġh un ke daroñ meñ the

sar-e-shām duur fazāoñ meñ ye jo aa.ine se chamak uThe

yahī Dhaltī dhuup ke rañg the ki jo tā.eroñ ke paroñ meñ the

jinhen mahfilon se gharaz na thi wo jo qaid apne gharon mein the

wahi eatibar-e-zamana the wahi log dida-waron mein the

hue hath ab to lahu lahu sar-e-chashm andhera hai chaar-su

kabhi hum bhi aaina-saz the kabhi hum bhi shisha-garon mein the

chali shahr mein wo hawa-e-zar ki ghubar ban ke gae bikhar

wo jo KHwab aankhon mein the makin wo junun jo apne saron mein the

mere muhsinon mein hain shahr ke ye tawil-o-ashna raste

kahin aur jae aman na thi ki ghanim-e-jaan to gharon mein the

wahi jin ki tegh se ban gaya mera shahr maqtal-e-KHun-fishan

sar-e-am dida-e-nam liye wahi log nauhagaron mein the

ek udas basti mein waqt-e-shab main gaya to aise makan the sab

na to khiDkiyon mein the mah-ru na charagh un ke daron mein the

sar-e-sham dur fazaon mein ye jo aaine se chamak uThe

yahi Dhalti dhup ke rang the ki jo taeron ke paron mein the