jis dam qafas mein mausam-e-gul ki KHabar gai

jis dam qafas meñ mausam-e-gul kī ḳhabar ga.ī

ik baar qaidiyoñ pe qayāmat guzar ga.ī

dhundlā ga.e nuqūsh to saaya sā ban gayā

dekhā kiyā maiñ un ko jahāñ tak nazar ga.ī

behtar thā maiñ jo duur se phūloñ ko dekhtā

chhūne se pattī pattī havā meñ bikhar ga.ī

kitne hī log sāhib-e-ehsās ho ga.e

ik be-navā kī chīḳh baḌā kaam kar ga.ī

tanhā.iyoñ ke shahr meñ kaun aa.egā 'shakeb'

so jaao ab to raat bhī aadhī guzar ga.ī

jis dam qafas mein mausam-e-gul ki KHabar gai

ek bar qaidiyon pe qayamat guzar gai

dhundla gae nuqush to saya sa ban gaya

dekha kiya main un ko jahan tak nazar gai

behtar tha main jo dur se phulon ko dekhta

chhune se patti patti hawa mein bikhar gai

kitne hi log sahib-e-ehsas ho gae

ek be-nawa ki chiKH baDa kaam kar gai

tanhaiyon ke shahr mein kaun aaega 'shakeb'

so jao ab to raat bhi aadhi guzar gai