jis ki na koi raat ho aisi sahar mile

jis kī na koī raat ho aisī sahar mile

saare ta.ayyunāt se ik din mafar mile

afvāh kis ne aisī uḌaa.ī ki shahr meñ

har shaḳhs bach rahā hai na us se nazar mile

dushvāriyāñ kuchh aur ziyāda hī baḌh ga.iiñ

ghar se chale to raah meñ itne shajar mile

tai karnā rah ga.ī haiñ abhī kitnī manzileñ

jo aage jā chuke haiñ kuchh un kī ḳhabar mile

mumkin hai aaḌe aa.eñ zamāna-shanāsiyāñ

tum bhī hamārī raah meñ haa.il agar mile

qaziya ho mausamoñ kā na din kā na raat kā

ab ke agar mile bhī to aisā safar mile

logoñ ko kyā paḌī thī uThāte aziyyateñ

sahrā kī ḳhaak chhānte āshufta-sar mile

jis ki na koi raat ho aisi sahar mile

sare tayyunat se ek din mafar mile

afwah kis ne aisi uDai ki shahr mein

har shaKHs bach raha hai na us se nazar mile

dushwariyan kuchh aur ziyaada hi baDh gain

ghar se chale to rah mein itne shajar mile

tai karna rah gai hain abhi kitni manzilen

jo aage ja chuke hain kuchh un ki KHabar mile

mumkin hai aaDe aaen zamana-shanasiyan

tum bhi hamari rah mein hail agar mile

qaziya ho mausamon ka na din ka na raat ka

ab ke agar mile bhi to aisa safar mile

logon ko kya paDi thi uThate aziyyaten

sahra ki KHak chhante aashufta-sar mile