jis ko kuchh dhan ho kare humse haqiqat ki bahs

jis ko kuchh dhan ho kare ham se haqīqat kī bahs

ki hamīñ jānte haiñ ahl-e-tarīqat kī bahs

qāziyā haath baḌhā shīsha-e-sahbā to utaar

tāq-e-nisyāñ pe tū rahne de sharī.at kī bahs

kar diyā mujtahid-e-vaqt ko qātil jhaT-paT

ham ne masjid meñ kal aise hī qayāmat kī bahs

bazm-e-rindāna meñ kyā riñd-o-vara.a kā charchā

shaiḳh-sāhib hai bahut ye to himāqat kī bahs

bū-alī saath koī bolte 'inshā' ko sune

roz hotī hai baham ahl-e-balāġhat kī bahs

jis ko kuchh dhan ho kare hum se haqiqat ki bahs

ki hamin jaante hain ahl-e-tariqat ki bahs

qaziya hath baDha shisha-e-sahba to utar

taq-e-nisyan pe tu rahne de shariat ki bahs

kar diya mujtahid-e-waqt ko qatil jhaT-paT

hum ne masjid mein kal aise hi qayamat ki bahs

bazm-e-rindana mein kya rind-o-wara ka charcha

shaiKH-sahib hai bahut ye to himaqat ki bahs

bu-ali sath koi bolte 'insha' ko sune

roz hoti hai baham ahl-e-balaghat ki bahs