جس کو نصیب عف قلب و نظر نہیں

جس کو نصیب عف قلب و نظر نہیں

آنکھوں میں لاکھ نور سہی دیدہ ور نہیں

حسن طلب نہیں کہیں ذوق نظر نہیں

ورنہ وہ آفتاب کہاں جلوہ گر نہیں

مانا کہ تو ہے محرم راز نہاں مگر

اپنی خبر نہیں ہے تو کچھ بھی خبر نہیں

میں خود ہی جذب عشق پہ قابو نہ رکھ سکا

تجھ سے تو کوئی شکوہ مجھے چشم تر نہیں

ہوتے ہیں باریاب یہاں سرفروش ہی

یہ بارگاہ عشق ہے خالہ کا گھر نہیں

حسن نظر عطا ہو تو ہر ذرہ طور ہے

کچھ بھی حسیں نہیں ہے جو حسن نظر نہیں

وہ کیا گئے کہ عشق کی دنیا اجڑ گئی

دیوار و در نہیں ہیں وہ شام و سحر نہیں

سن کر ترے کلام کو وہ ہم کلام ہوں

صابرؔ ترے کلام میں اتنا اثر نہیں