jis se bezar rahe the wahi dar kya kuchh hai

jis se bezār rahe the vahī dar kyā kuchh hai

ghar kī duurī ne ye samjhāyā ki ghar kyā kuchh hai

shukr kartā huuñ ḳhudā ne mujhe mahsūd kiyā

ab maiñ samjhā ki mire paas hunar kyā kuchh hai

rāt-bhar jaag ke kaaTe to koī merī tarah

ḳhud-ba-ḳhud samjhegā vo pichhlā pahar kyā kuchh hai

koī jhoñkā nahīñ sankā chaman-e-rafta se

koī sun-gun nahīñ yāroñ kī ḳhabar kyā kuchh hai

nigarāñ sū-e-zamīñ dīda-e-aflāk hai aaj

jāda-e-vaqt pe miTTī kā safar kyā kuchh hai

jaise qismat kī lakīroñ pe hameñ chalnā hai

kaun samjhegā terī rāhguzar kyā kuchh hai

varaq-e-gul pe hai tahrīr sī donoñ jānib

ham ne kyā dekhā udhar jaane udhar kyā kuchh hai

chal paḌe sub.h-e-azal 'shāz' ishāre pe tire

ham ne sochā hī nahīñ raḳht-e-safar kyā kuchh hai

jis se bezar rahe the wahi dar kya kuchh hai

ghar ki duri ne ye samjhaya ki ghar kya kuchh hai

shukr karta hun KHuda ne mujhe mahsud kiya

ab main samjha ki mere pas hunar kya kuchh hai

raat-bhar jag ke kaTe to koi meri tarah

KHud-ba-KHud samjhega wo pichhla pahar kya kuchh hai

koi jhonka nahin sanka chaman-e-rafta se

koi sun-gun nahin yaron ki KHabar kya kuchh hai

nigaran su-e-zamin dida-e-aflak hai aaj

jada-e-waqt pe miTTi ka safar kya kuchh hai

jaise qismat ki lakiron pe hamein chalna hai

kaun samjhega teri rahguzar kya kuchh hai

waraq-e-gul pe hai tahrir si donon jaanib

hum ne kya dekha udhar jaane udhar kya kuchh hai

chal paDe subh-e-azal 'shaz' ishaare pe tere

hum ne socha hi nahin raKHt-e-safar kya kuchh hai