jo achchhe hain unki kahani bhi achchhi

jo achchhe haiñ un kī kahānī bhī achchhī

laḌakpan bhī achchhā javānī bhī achchhī

tirī mehrbānī na achchhī ho kyuuñ kar

ki hai terī nā-mehrbānī bhī achchhī

dar-e-yār se ham ko uThnā hai mushkil

jo aisī ho to nā-tavānī bhī achchhī

tire tiir ko apnā dil kyuuñ na deñ ham

nishāna bhī achchhā nishānī bhī achchhī

jo ho sidq-e-dil se koī sunñe vaalā

to vallāh jhūTī kahānī bhī achchhī

kahīñ ishq meñ bad-gumānī burī hai

kahīñ ishq meñ bad-gumānī bhī achchhī

mai-e-nāb kī qadr ham jānte haiñ

na.ī to na.ī ye purānī bhī achchhī

na ho dil meñ lekin mire dil ke haq meñ

tumhārī mohabbat zabānī bhī achchhī

agar 'nūh' kī sher-goī hai behtar

to hai 'nūh' kī sher-ḳhvānī bhī achchhī

jo achchhe hain un ki kahani bhi achchhi

laDakpan bhi achchha jawani bhi achchhi

teri mehrbani na achchhi ho kyun kar

ki hai teri na-mehrbani bhi achchhi

dar-e-yar se hum ko uThna hai mushkil

jo aisi ho to na-tawani bhi achchhi

tere tir ko apna dil kyun na den hum

nishana bhi achchha nishani bhi achchhi

jo ho sidq-e-dil se koi sunne wala

to wallah jhuTi kahani bhi achchhi

kahin ishq mein bad-gumani buri hai

kahin ishq mein bad-gumani bhi achchhi

mai-e-nab ki qadr hum jaante hain

nai to nai ye purani bhi achchhi

na ho dil mein lekin mere dil ke haq mein

tumhaari mohabbat zabani bhi achchhi

agar 'nuh' ki sher-goi hai behtar

to hai 'nuh' ki sher-KHwani bhi achchhi