jo kuchh bhi guzarta hai mere dil pe guzar jae

jo kuchh bhī guzartā hai mire dil pe guzar jaa.e

utrā huā chehra mirī dhartī kā nikhar jaa.e

ik shahr-e-sadā siine meñ ābād hai lekin

ik ālam-e-ḳhāmosh hai jis samt nazar jaa.e

ham bhī haiñ kisī kahf ke as.hāb kī mānind

aisā na ho jab aañkh khule vaqt guzar jaa.e

jab saañp hī Dasvāne kī aadat hai to yaaro

jo zahr zabāñ par hai vo dil meñ bhī utar jaa.e

kashtī hai magar ham meñ koī nuuh nahīñ hai

aayā huā tūfān ḳhudā jaane kidhar jaa.e

maiñ saaya kiye abr ke mānind chalūñgā

ai dost jahāñ tak bhī tirī rāhguzar jaa.e

maiñ kuchh na kahūñ aur ye chāhūñ ki mirī baat

ḳhushbū kī tarah uḌ ke tire dil meñ utar jaa.e

jo kuchh bhi guzarta hai mere dil pe guzar jae

utra hua chehra meri dharti ka nikhar jae

ek shahr-e-sada sine mein aabaad hai lekin

ek aalam-e-KHamosh hai jis samt nazar jae

hum bhi hain kisi kahf ke ashab ki manind

aisa na ho jab aankh khule waqt guzar jae

jab sanp hi Daswane ki aadat hai to yaro

jo zahr zaban par hai wo dil mein bhi utar jae

kashti hai magar hum mein koi nuh nahin hai

aaya hua tufan KHuda jaane kidhar jae

main saya kiye abr ke manind chalunga

ai dost jahan tak bhi teri rahguzar jae

main kuchh na kahun aur ye chahun ki meri baat

KHushbu ki tarah uD ke tere dil mein utar jae