jo mast-e-jam-e-baada-e-irfan na ho saka

jo mast-e-jām-e-bāda-e-irfāñ na ho sakā

vo jānvar hī rah gayā insāñ na ho sakā

jo bhī sharīk-e-mahfil-e-rindāñ na ho sakā

vo bevaqūf kāmil-e-īmāñ na ho sakā

vaa.iz bhī haiñ vo zāt-e-girāmī ki al-hazar

ham-pallā jin kā dahr meñ shaitāñ na ho sakā

fitrat badal sakī na kabhī mere dost kī

lahbaḌ kisī tarah se bhī Toiyāñ na ho sakā

dāmān-e-hashr aa hī gayā kaam hashr meñ

neck-tie ban ga.ī jo girebāñ na ho sakā

insānoñ ke zamīr bike kauḌiyoñ ke mol

ġhalla magar girāñ rahā arzāñ na ho sakā

ye kashmakash zamāne kī allāh kī panāh

jiinā to jiinā marnā bhī āsāñ na ho sakā

vo hoñge kyā kisī se zamāne meñ ham-nabard

jin pāgaloñ se chaak girebāñ na ho sakā

batlā rahī hai shaiḳh kī taqrīr-e-muzmahil

kuchh aaj halve-māñDe kā sāmāñ na ho sakā

eḌī ragaḌ ke najd meñ dīvāna mar gayā

aur us ke naam aloT bayābāñ na ho sakā

rahzan libās-e-rāhbarī meñ na chhup sakā

aalū ne laakh chāhā pe ghuiyāñ na ho sakā

dilchasp ho sakā na kabhī shaiḳh kā bayāñ

kavvā ġharīb murġh-e-ḳhush-alhāñ na ho sakā

ai 'shauq' ronā aatā hai us bad-nasīb par

jo ḳhāk-rūb-e-kūcha-e-jānāñ na ho sakā

jo mast-e-jam-e-baada-e-irfan na ho saka

wo jaanwar hi rah gaya insan na ho saka

jo bhi sharik-e-mahfil-e-rindan na ho saka

wo bewaquf kaamil-e-iman na ho saka

waiz bhi hain wo zat-e-girami ki al-hazar

ham-palla jin ka dahr mein shaitan na ho saka

fitrat badal saki na kabhi mere dost ki

lahbaD kisi tarah se bhi Toiyan na ho saka

daman-e-hashr aa hi gaya kaam hashr mein

neck-tie ban gai jo gireban na ho saka

insanon ke zamir bike kauDiyon ke mol

ghalla magar giran raha arzan na ho saka

ye kashmakash zamane ki allah ki panah

jina to jina marna bhi aasan na ho saka

wo honge kya kisi se zamane mein ham-nabard

jin pagalon se chaak gireban na ho saka

batla rahi hai shaiKH ki taqrir-e-muzmahil

kuchh aaj halwe-manDe ka saman na ho saka

eDi ragaD ke najd mein diwana mar gaya

aur us ke nam aloT bayaban na ho saka

rahzan libas-e-rahbari mein na chhup saka

aalu ne lakh chaha pe ghuiyan na ho saka

dilchasp ho saka na kabhi shaiKH ka bayan

kawwa gharib murgh-e-KHush-alhan na ho saka

ai 'shauq' rona aata hai us bad-nasib par

jo KHak-rub-e-kucha-e-jaanan na ho saka