jo saqiya tu ne pi ke hum ko diya hai jam-e-sharab aadha

jo sāqiyā tū ne pī ke ham ko diyā hai jām-e-sharāb aadhā

tū apne dāñtoñ se kaaT kar de hamāre muñh meñ kabāb aadhā

vo pur-gunah huuñ ki rah ga.e sab usī meñ din kaT gayā vo saarā

hanūz mahshar ke mahkame meñ huā thā merā hisāb aadhā

kahāñ ga.ī ab vo lan-tarānī na taab jalve kī laa.e āshiq

hunūz kholā thā bahr-e-dīdār us ne band-e-naqāb aadhā

jazā-e-kāmil jo chāhtā hai to zab.h kar Daal jald qātil

na chhoḌnā mujh ko nīm-bismil ki pā.egā tū savāb aadhā

dimāġh dekho mire sanam kā gilā jo kartā huuñ maiñ sitam kā

to dete haiñ saarī baat kā vo mujhe ba-diqqat javāb aadhā

safed-o-surḳh hai aisī rañgat ki jab banā hogā us kā putlā

milāyā hovegā us meñ sāne.a ne maidā aadhā shahāb aadhā

dupaTTa āb-e-ravāñ kā sar kā jo us kī mahram se samjhe ye ham

ki bahr-e-husn-e-sanam kā ham ko diyā dikhā.ī habāb aadhā

ishāra hai saaf ai 'qalaq' ye ki aao sahbā-kashī ho bāham

jo us ne bhejī hai apnī jhūTī sharāb aadhī kabāb aadhā

jo saqiya tu ne pi ke hum ko diya hai jam-e-sharab aadha

tu apne danton se kaT kar de hamare munh mein kabab aadha

wo pur-gunah hun ki rah gae sab usi mein din kaT gaya wo sara

hanuz mahshar ke mahkame mein hua tha mera hisab aadha

kahan gai ab wo lan-tarani na tab jalwe ki lae aashiq

hunuz khola tha bahr-e-didar us ne band-e-naqab aadha

jaza-e-kaamil jo chahta hai to zabh kar Dal jald qatil

na chhoDna mujh ko nim-bismil ki paega tu sawab aadha

dimagh dekho mere sanam ka gila jo karta hun main sitam ka

to dete hain sari baat ka wo mujhe ba-diqqat jawab aadha

safed-o-surKH hai aisi rangat ki jab bana hoga us ka putla

milaya howega us mein sanea ne maida aadha shahab aadha

dupaTTa aab-e-rawan ka sar ka jo us ki mahram se samjhe ye hum

ki bahr-e-husn-e-sanam ka hum ko diya dikhai habab aadha

ishaara hai saf ai 'qalaq' ye ki aao sahba-kashi ho baham

jo us ne bheji hai apni jhuTi sharab aadhi kabab aadha