jo sochon mein kabhi hum paikar-e-sahra banate hain

jo sochoñ meñ kabhī ham paikar-e-sahrā banāte haiñ

to kuchh ḳheme banāte haiñ aur ik dariyā banāte haiñ

amīr-e-shahr ham se is liye nārāz rahtā hai

ki ham in shahr vāloñ ko junūñ-pesha banāte haiñ

tirā ye haal ab ai muflisī dekhā nahīñ jaatā

tirī uñglī pakaḌte haiñ tujhe andhā banāte haiñ

baġhair is ke kisī paikar ko bīnā.ī nahīñ miltī

isī bā'is ġhazal meñ ham tirā chehra banāte haiñ

na ham pāras kā TukḌā aur na 'be-dil' ā.ina-gar haiñ

magar dasht-e-hunar kī ḳhaak ko sonā banāte haiñ

jo sochon mein kabhi hum paikar-e-sahra banate hain

to kuchh KHeme banate hain aur ek dariya banate hain

amir-e-shahr hum se is liye naraaz rahta hai

ki hum in shahr walon ko junun-pesha banate hain

tera ye haal ab ai muflisi dekha nahin jata

teri ungli pakaDte hain tujhe andha banate hain

baghair is ke kisi paikar ko binai nahin milti

isi ba'is ghazal mein hum tera chehra banate hain

na hum paras ka TukDa aur na 'be-dil' aaina-gar hain

magar dasht-e-hunar ki KHak ko sona banate hain