juda hote nahin aise bhi kuchh aazar hote hain

judā hote nahīñ aise bhī kuchh āzār hote haiñ

safar ke āḳhirī raste baḌe dushvār hote haiñ

jo chehre par likhī tahrīr paḌh lete haiñ pal bhar meñ

kuchh aise log haiñ misl-e-sitāra-bār hote haiñ

yahāñ jo bhī hai sab bātil nazar kā ek dhokā hai

to phir kis baat par ham yūñhī da.avedār hote haiñ

chaTTānoñ par hare patte kahīñ naġhma-sarā patthar

naved-e-zindagī ke ye hī to āsār hote haiñ

hamārī bhīgtī āñkheñ tumhāre muskurāte lab

mohabbat ke yahī lamhe baḌe sarshār hote haiñ

hamārī muskurāhaT to hamāre ġham chhupātī hai

hamāre rāz-dāñ ghar ke dar-o-dīvār hote haiñ

safar jitnā bhī tai paayā ye saarā khel lagtā hai

yuuñ lagtā hai sabhī kār-e-hunar be-kār hote haiñ

jo tum ne kar diyā so kar diyā dariyā meñ jaane do

phir is ke ba.ad to shikve gile be-kār hote haiñ

juda hote nahin aise bhi kuchh aazar hote hain

safar ke aaKHiri raste baDe dushwar hote hain

jo chehre par likhi tahrir paDh lete hain pal bhar mein

kuchh aise log hain misl-e-sitara-bar hote hain

yahan jo bhi hai sab baatil nazar ka ek dhoka hai

to phir kis baat par hum yunhi dawedar hote hain

chaTTanon par hare patte kahin naghma-sara patthar

nawed-e-zindagi ke ye hi to aasar hote hain

hamari bhigti aankhen tumhaare muskuraate lab

mohabbat ke yahi lamhe baDe sarshaar hote hain

hamari muskurahaT to hamare gham chhupati hai

hamare raaz-dan ghar ke dar-o-diwar hote hain

safar jitna bhi tai paya ye sara khel lagta hai

yun lagta hai sabhi kar-e-hunar be-kar hote hain

jo tum ne kar diya so kar diya dariya mein jaane do

phir is ke baad to shikwe gile be-kar hote hain