جنوں ہے دشت ہے تنہائیاں ہیں اور میں ہوں

جنوں ہے دشت ہے تنہائیاں ہیں اور میں ہوں

ازل سے بادیہ پیمائیاں ہیں اور میں ہوں

مری غزل میں ہیں قوس قزح کے ساتوں رنگ

عروس فکر کی انگڑائیاں ہیں اور میں ہوں

کہاں محاذ سخن اور کہاں مرا جیسا

بس اس کی حوصلہ افزائیاں ہیں اور میں ہوں

وہی ہے میرا محافظ وہی نگہباں ہے

کہ میرے دونوں طرف کھائیاں ہیں اور میں ہوں

نہ پوچھئے مرے عیش و نشاط کے اسباب

سنہرے خوابوں کی رعنائیاں ہیں اور میں ہوں

ہرا بھرا نہ رہے کس لئے مرا ہر زخم

کہ حادثات کی پروائیاں ہیں اور میں ہوں

اکیلے پن کا جو احساس تھا وہ اب بھی ہے

نظر فریب شناسائیاں ہیں اور میں ہوں

ہراس خوف سراسیمگی دھواں آتش

گزشتہ عہد کی پرچھائیاں ہیں اور میں ہوں

سخن شناسوں کی محفل میں آج اے رہبرؔ

رباعیات ہیں چوپائیاں ہیں اور میں ہوں