jun nikhat-e-gul jumbish hai ji ka nikal jaana

juuñ nik.hat-e-gul jumbish hai jī kā nikal jaanā

ai bād-e-sabā merī karvaT to badal jaanā

pā-laġhz-e-mohabbat se mushkil hai sañbhal jaanā

us ruḳh kī safā.ī par is dil kā phisal jaanā

siine meñ jo dil taḌpā dhar hī to diyā dekhā

phir bhuul gayā kaisā maiñ haath kā phal jaanā

itnā to na ghabrāo rāhat yahīñ farmāo

ghar meñ mire rah jaao aaj aur bhī kal jaanā

ai dil vo jo yaañ aayā kyā kyā hameñ tarsāyā

tū ne kahīñ sikhlāyā qaabū se nikal jaanā

kyā aise se da.avā ho mahshar meñ ki maiñ ne to

nazzāra-e-qātil ko ehsān-e-ajal jaanā

hai zulm karam jitnā thā farq paḌā kitnā

mushkil hai mizāj itnā ik baar badal jaanā

hūroñ kī sanā-ḳhvānī vaa.iz yuuñ hī kab maanī

le aa ki hai nādānī bātoñ meñ bahal jaanā

ishq un kī balā jaane āshiq hoñ to pahchāne

lo mujh ko atibbā ne saude kā ḳhalal jaanā

kyā bāteñ banātā hai vo jaan jalātā hai

paanī meñ dikhātā hai kāfūr kā jal jaanā

matlab hai ki vaslat meñ hai bul-havas aafat meñ

is garmi-e-sohbat meñ ai dil na pighal jaanā

dam lene kī tāqat hai bīmār-e-mohabbat hai

itnā bhī ġhanīmat hai 'momin' kā sambhal jaanā

jun nikhat-e-gul jumbish hai ji ka nikal jaana

ai baad-e-saba meri karwaT to badal jaana

pa-laghz-e-mohabbat se mushkil hai sanbhal jaana

us ruKH ki safai par is dil ka phisal jaana

sine mein jo dil taDpa dhar hi to diya dekha

phir bhul gaya kaisa main hath ka phal jaana

itna to na ghabrao rahat yahin farmao

ghar mein mere rah jao aaj aur bhi kal jaana

ai dil wo jo yan aaya kya kya hamein tarsaya

tu ne kahin sikhlaya qabu se nikal jaana

kya aise se dawa ho mahshar mein ki main ne to

nazzara-e-qatil ko ehsan-e-ajal jaana

hai zulm karam jitna tha farq paDa kitna

mushkil hai mizaj itna ek bar badal jaana

huron ki sana-KHwani waiz yun hi kab mani

le aa ki hai nadani baaton mein bahal jaana

ishq un ki bala jaane aashiq hon to pahchane

lo mujh ko atibba ne saude ka KHalal jaana

kya baaten banata hai wo jaan jalata hai

pani mein dikhata hai kafur ka jal jaana

matlab hai ki waslat mein hai bul-hawas aafat mein

is garmi-e-sohbat mein ai dil na pighal jaana

dam lene ki taqat hai bimar-e-mohabbat hai

itna bhi ghanimat hai 'momin' ka sambhal jaana