kaghzi phul khila rakkhe hain

kāġhzī phuul khilā rakkhe haiñ

rishta-e-dard nibhā rakkhe haiñ

dil-e-barbād ne ḳhāmoshī se

kitne armān sulā rakkhe haiñ

raat ke pichhle pahar ashkoñ se

diip se diip jalā rakkhe haiñ

vo nahīñ jānte magar sach hai

tār-e-dil un se milā rakkhe haiñ

vo jo aa.e to hazāroñ shikve

phir kisī din pe uThā rakkhe haiñ

kyā samajh pā.eñge ġham ko mere

but-kade meñ jo ḳhudā rakkhe haiñ

koī ta.abīr mile yā na mile

ḳhvāb palkoñ pe sajā rakkhe haiñ

kaghzi phul khila rakkhe hain

rishta-e-dard nibha rakkhe hain

dil-e-barbaad ne KHamoshi se

kitne arman sula rakkhe hain

raat ke pichhle pahar ashkon se

dip se dip jala rakkhe hain

wo nahin jaante magar sach hai

tar-e-dil un se mila rakkhe hain

wo jo aae to hazaron shikwe

phir kisi din pe uTha rakkhe hain

kya samajh paenge gham ko mere

but-kade mein jo KHuda rakkhe hain

koi tabir mile ya na mile

KHwab palkon pe saja rakkhe hain