kash main bhul sakun aaj hi chehra tera

kaash maiñ bhuul sakūñ aaj hī chehrā terā

bujhne paa.e na magar ishq kā sho.ala terā

koī sūrat koī manzil na rahī yaad mujhe

haañ agar yaad rahā hai to vo rasta terā

tū kahīñ khoyā gayā ho to maiñ DhūñDūñ tujh ko

sabt hai dil pe mire naqsh-e-kaf-e-pā terā

maiñ ne chāhā thā parastish kī hadoñ tak tujh ko

terī bad-ḳhūī ne dhuñdlā diyā naqsha terā

paañv gaaḌe rahā barsoñ maiñ daraḳhtoñ kī tarah

āḳhir-e-kār bahā le gayā dariyā terā

maut kī merī duā karte the aur kahte the dost

ham se dekhā nahīñ jaatā hai tamāshā terā

hai koī aisā ki jo us ko batā.e 'shohrat'

chashma-e-āb-e-baqā mar gayā pyāsā terā

kash main bhul sakun aaj hi chehra tera

bujhne pae na magar ishq ka shoala tera

koi surat koi manzil na rahi yaad mujhe

han agar yaad raha hai to wo rasta tera

tu kahin khoya gaya ho to main DhunDun tujh ko

sabt hai dil pe mere naqsh-e-kaf-e-pa tera

main ne chaha tha parastish ki hadon tak tujh ko

teri bad-KHui ne dhundla diya naqsha tera

panw gaDe raha barson main daraKHton ki tarah

aaKHir-e-kar baha le gaya dariya tera

maut ki meri dua karte the aur kahte the dost

hum se dekha nahin jata hai tamasha tera

hai koi aisa ki jo us ko batae 'shohrat'

chashma-e-ab-e-baqa mar gaya pyasa tera