kaTi nahin to har taraf phailegi shaKH jabr ki

kaaTī nahīñ to har taraf phailegī shāḳh jabr kī

sabr kī baat chhoḌiye hotī hai had bhī sabr kī

DhūñD ab aisī sarzamīñ jis kī tamām khetiyāñ

māñgeñ na āsmān se bhiik kabhī bhī abr kī

karb kā bahr-e-bekarāñ chāroñ taraf hai maujzan

ghar meñ ghaḌī muqīm hai kab se azāb-e-qabr kī

pahle to ghar ke sahn meñ dhuup kī barchhiyāñ girīñ

baad meñ chhat pe aa ga.ī fauj ġhanīm-e-abr kī

bhiik meñ le ke jur.ateñ aa.e to paañv jhaḌ ga.e

phāñd sake na is liye log fasīl jabr kī

rāh-e-murād is liye aur bhī duur ho ga.ī

us meñ thā qaht-e-hausla mujh meñ kamī thī sabr kī

sahn meñ phuul phuul jism khel rahe haiñ har taraf

ḳhauf nahīñ hai dhuup kā fikr nahīñ hai abr kī

kaTi nahin to har taraf phailegi shaKH jabr ki

sabr ki baat chhoDiye hoti hai had bhi sabr ki

DhunD ab aisi sarzamin jis ki tamam khetiyan

mangen na aasman se bhik kabhi bhi abr ki

karb ka bahr-e-bekaran chaaron taraf hai maujzan

ghar mein ghaDi muqim hai kab se azab-e-qabr ki

pahle to ghar ke sahn mein dhup ki barchhiyan girin

baad mein chhat pe aa gai fauj ghanim-e-abr ki

bhik mein le ke juraten aae to panw jhaD gae

phand sake na is liye log fasil jabr ki

rah-e-murad is liye aur bhi dur ho gai

us mein tha qaht-e-hausla mujh mein kami thi sabr ki

sahn mein phul phul jism khel rahe hain har taraf

KHauf nahin hai dhup ka fikr nahin hai abr ki