kab kaha maine ki tum chahne walon mein raho

kab kahā maiñ ne ki tum chāhne vāloñ meñ raho

tum ġhazal ho to ġhazal ban ke ḳhayāloñ meñ raho

husn aisā hai tumhārā ki nahīñ jis kā javāb

is liye jān-e-vafā tum to savāloñ meñ raho

chhup gayā chāñd añdherā hai bharī mahfil meñ

tum mire dil meñ utar jaao ujāloñ meñ raho

apnī ḳhushbū ko fazāoñ meñ bikhar jaane do

phuul ban jaao mahakte hue bāloñ meñ raho

aane jaane kī kahīñ tum ko zarūrat kyā hai

shahr-e-ḳhūbāñ meñ raho mast ġhazāloñ meñ raho

umr-bhar ke liye ho jaao kisī ke 'aḳhtar'

ishq aisā karo duniyā kī misāloñ meñ raho

kab kaha main ne ki tum chahne walon mein raho

tum ghazal ho to ghazal ban ke KHayalon mein raho

husn aisa hai tumhaara ki nahin jis ka jawab

is liye jaan-e-wafa tum to sawalon mein raho

chhup gaya chand andhera hai bhari mahfil mein

tum mere dil mein utar jao ujalon mein raho

apni KHushbu ko fazaon mein bikhar jaane do

phul ban jao mahakte hue baalon mein raho

aane jaane ki kahin tum ko zarurat kya hai

shahr-e-KHuban mein raho mast ghazalon mein raho

umr-bhar ke liye ho jao kisi ke 'aKHtar'

ishq aisa karo duniya ki misalon mein raho