kab tak hawa-e-shauq se dil ko bachaiye

kab tak havā-e-shauq se dil ko bachā.iye

mausam kā jo bhī mashvara ho maan jā.iye

pī hai agar sharāb to kuchh lutf uThā.iye

kyoñ itnī ehtiyāt zarā laḌkhaḌā.iye

lene na degī chain mohabbat kī tez aañch

chhīñToñ se us ko aaj havas ke bujhā.iye

itnā lihāz ruuh kā aur itnī farbahī

jhūTā hai shaiḳh bātoñ meñ us kī na aa.iye

vo bā-vafā nahīñ na sahī ḳhush-adā to hai

gar kuchh nahīñ to hazz-e-nazar hī uThā.iye

vaa.iz bayān-e-ḳhuld bahut ḳhuub hai magar

ik roz us kī bazm meñ bhī ho ke aa.iye

kab tak hawa-e-shauq se dil ko bachaiye

mausam ka jo bhi mashwara ho man jaiye

pi hai agar sharab to kuchh lutf uThaiye

kyon itni ehtiyat zara laDkhaDaiye

lene na degi chain mohabbat ki tez aanch

chhinTon se us ko aaj hawas ke bujhaiye

itna lihaz ruh ka aur itni farbahi

jhuTa hai shaiKH baaton mein us ki na aaiye

wo ba-wafa nahin na sahi KHush-ada to hai

gar kuchh nahin to hazz-e-nazar hi uThaiye

waiz bayan-e-KHuld bahut KHub hai magar

ek roz us ki bazm mein bhi ho ke aaiye