kabhi ahl-e-muhabbat yun na KHauf-e-jism-o-jaan karte

kabhī ahl-e-muhabbat yuuñ na ḳhauf-e-jism-o-jāñ karte

agar shaiḳh-o-barahman jashn-e-nāqūs-o-azāñ karte

navāzish kaash mujh par itnī mere mehrbāñ karte

kabhī dil kī tasallī ke liye bhūle se haañ karte

hamāre jazba-e-tāmīr se hote agar vāqif

to sadiyoñ barq ke sho'le tavāf-e-āshiyāñ karte

fasurda yuuñ na hote ġhuncha-o-gul mausam-e-gul meñ

agar dil se chaman kī ābiyārī bāġhbāñ karte

naved-e-fasl-e-gul aate haiñ dil apnā taḌap uTThā

asīr-e-ġham haiñ varna ham bhī sair-e-gulsitāñ karte

fazā-e-sāhil-e-ummīd agar kuchh raas aa jaatī

to ham kyuuñ nazr-e-tūfāñ kashti-e-umr-e-ravāñ karte

hameñ bhī mil ga.ī hotī sanad manzil-shanāsī kī

salīqe se agar taqlīd mīr-e-kārvāñ karte

kabhī bād-e-sabā ban kar kabhī jārūb-kash ho kar

tamannā thī musalsal ham tavāf-e-āstāñ karte

thā chup rahnā hī behtar un kī bazm-e-nāz meñ 'ājiz'

koī ġham-āshnā hotā to sharh-e-dāstāñ karte

kabhi ahl-e-muhabbat yun na KHauf-e-jism-o-jaan karte

agar shaiKH-o-barahman jashn-e-naqus-o-azan karte

nawazish kash mujh par itni mere mehrban karte

kabhi dil ki tasalli ke liye bhule se han karte

hamare jazba-e-tamir se hote agar waqif

to sadiyon barq ke sho'le tawaf-e-ashiyan karte

fasurda yun na hote ghuncha-o-gul mausam-e-gul mein

agar dil se chaman ki aabiyari baghban karte

nawed-e-fasl-e-gul aate hain dil apna taDap uTTha

asir-e-gham hain warna hum bhi sair-e-gulsitan karte

faza-e-sahil-e-ummid agar kuchh ras aa jati

to hum kyun nazr-e-tufan kashti-e-umr-e-rawan karte

hamein bhi mil gai hoti sanad manzil-shanasi ki

saliqe se agar taqlid mir-e-karwan karte

kabhi baad-e-saba ban kar kabhi jarub-kash ho kar

tamanna thi musalsal hum tawaf-e-astan karte

tha chup rahna hi behtar un ki bazm-e-naz mein 'ajiz'

koi gham-ashna hota to sharh-e-dastan karte