kabhi hai aaj aur kal kabhi hai bhala ye ahd-e-visal kya hai

kabhī hai aaj aur kal kabhī hai bhalā ye ahd-e-visāl kyā hai

ho va.ada iifā ki tark-e-ulfat ye roz-marra kī Taal kyā hai

zabān bigḌī hai aap hī kī hamārā nuqsān kyā hai is meñ

zarā tumhīñ pūchhūñ dil se apne bhalā ye tarz-e-maqāl kyā hai

jo māñgā ik bosa maiñ ne un se to bole kyā tū saḌī huā hai

zarā ye bāteñ suno to logo javāb kyā hai savāl kyā hai

unheñ sar-e-rah akelā pā kar ye bolā chhātī se maiñ lagā kar

ki ab to farmā deñ banda-parvar visāl meñ qīl-o-qāl kyā hai

haiñ tark-e-ulfat meñ ham bhī raazī ye kah do be-khaTke us sanam se

butoñ kā is hind kī zamīñ par ḳhudā kī rahmat se kaal kyā hai

kaḌā rakhe aadmī jo dil ko to jhel le har kaḌī ko āsāñ

bañdhī huī ho jo apnī himmat to kaam koī muhāl kyā hai

ye kaisī haiñ ThanDī sāñseñ 'kaifī' kahīñ to aayā hai aap kā dil

ye muñh nikal aayā kyuuñ zarā sā batā.iye to ki haal kyā hai

kabhi hai aaj aur kal kabhi hai bhala ye ahd-e-visal kya hai

ho wada ifa ki tark-e-ulfat ye roz-marra ki Tal kya hai

zaban bigDi hai aap hi ki hamara nuqsan kya hai is mein

zara tumhin puchhun dil se apne bhala ye tarz-e-maqal kya hai

jo manga ek bosa main ne un se to bole kya tu saDi hua hai

zara ye baaten suno to logo jawab kya hai sawal kya hai

unhen sar-e-rah akela pa kar ye bola chhati se main laga kar

ki ab to farma den banda-parwar visal mein qil-o-qal kya hai

hain tark-e-ulfat mein hum bhi raazi ye kah do be-khaTke us sanam se

buton ka is hind ki zamin par KHuda ki rahmat se kal kya hai

kaDa rakhe aadmi jo dil ko to jhel le har kaDi ko aasan

bandhi hui ho jo apni himmat to kaam koi muhaal kya hai

ye kaisi hain ThanDi sansen 'kaifi' kahin to aaya hai aap ka dil

ye munh nikal aaya kyun zara sa bataiye to ki haal kya hai