kabhi ilm ne use mat di kabhi aagahi ne hara diya

kabhī ilm ne use maat dī kabhī āgahī ne harā diyā

jise tīrgī na harā sakī use raushnī ne harā diyā

kabhī ḳhushk un ke na lab hue rahī jin kī qatroñ se dostī

jo samundaroñ ke rafīq the unheñ tishnagī ne harā diyā

jinheñ bebasī na harā sakī unheñ phir na koī harā sakā

jo zarūratoñ ke ġhulām the unheñ har kisī ne harā diyā

hameñ sar-bulandī atā huī jahāñ jis mahāz pe DaT ga.e

mare roz jis kī talab meñ ham usī zindagī ne harā diyā

na hai ilm-o-fan kī talab tumheñ na taraqqiyoñ kā junūn hai

jo tumhārā tarz-e-hayāt hai tumheñ bas usī ne harā diyā

rah-e-ishq meñ jo fanā hue unheñ jāvedānī atā huī

jo asīr-e-husn-e-hayāt the unheñ be-hisī ne harā diyā

kabhi ilm ne use mat di kabhi aagahi ne hara diya

jise tirgi na hara saki use raushni ne hara diya

kabhi KHushk un ke na lab hue rahi jin ki qatron se dosti

jo samundaron ke rafiq the unhen tishnagi ne hara diya

jinhen bebasi na hara saki unhen phir na koi hara saka

jo zaruraton ke ghulam the unhen har kisi ne hara diya

hamein sar-bulandi ata hui jahan jis mahaz pe DaT gae

mare roz jis ki talab mein hum usi zindagi ne hara diya

na hai ilm-o-fan ki talab tumhein na taraqqiyon ka junun hai

jo tumhaara tarz-e-hayat hai tumhein bas usi ne hara diya

rah-e-ishq mein jo fana hue unhen jawedani ata hui

jo asir-e-husn-e-hayat the unhen be-hisi ne hara diya