kabhi kabhi teri aawaz par rukun bhi nahin

kabhī kabhī tirī āvāz par rukūñ bhī nahīñ

ki tū bulā.e mujhe aur maiñ sunūñ bhī nahīñ

is intizār meñ zid kā bhī ek pahlū hai

kivāḌ khol duuñ aur rāsta takūñ bhī nahīñ

tamām shahr sune mujh ko tere hoñToñ se

tire sivā maiñ kisī aur pe khilūñ bhī nahīñ

vo duur ho to lage us se koī rishta hai

qarīb aa.e to maiñ us kā kuchh lagūñ bhī nahīñ

likhegā kaun adhūrī talāsh kā nauha

tirī talab kā mire sar meñ ab junūñ bhī nahīñ

na jaane TuuT ke gir jaa.e kab saroñ pe 'shakīl'

ki āsmāñ kī imārat meñ ik sutūñ bhī nahīñ

kabhi kabhi teri aawaz par rukun bhi nahin

ki tu bulae mujhe aur main sunun bhi nahin

is intizar mein zid ka bhi ek pahlu hai

kiwaD khol dun aur rasta takun bhi nahin

tamam shahr sune mujh ko tere honTon se

tere siwa main kisi aur pe khilun bhi nahin

wo dur ho to lage us se koi rishta hai

qarib aae to main us ka kuchh lagun bhi nahin

likhega kaun adhuri talash ka nauha

teri talab ka mere sar mein ab junun bhi nahin

na jaane TuT ke gir jae kab saron pe 'shakil'

ki aasman ki imarat mein ek sutun bhi nahin